Monday, June 27, 2016

പണപ്പിരിവിന്റെ സ്വലാത്ത് രാവുകൾ


പണപ്പിരിവിന്റെ സ്വലാത്ത് രാവുകൾ

(വർത്തമാനം ദിനപത്രം 2008ൽ പുറത്തിറക്കിയ ‘ആൾ ദൈവങ്ങളുടെ സ്വന്തം നാട്’ എന്ന സ്പെഷൽ പതിപ്പിൽ നിന്ന്)


Add caption



പണപ്പിരിവിന്റെ സ്വലാത്ത് രാവുകൾ


പണപ്പിരിവിന്റെ സ്വലാത്ത് രാവുകൾ

(വർത്തമാനം ദിനപത്രം 2008ൽ പുറത്തിറക്കിയ ‘ആൾ ദൈവങ്ങളുടെ സ്വന്തം നാട്’ എന്ന സ്പെഷൽ പതിപ്പിൽ നിന്ന്)


Add caption



Wednesday, May 25, 2016

ഭരണീയരും ഭരണകർത്താക്കളും

ഭരണീയരും ഭരണകർത്താക്കളും


അബ്ദുസ്സലാം കുനിയിൽ
(ശബാബ് വാരിക, 2001 ഏപ്രിൽ 6)

         ഉബാദത്തുബ്‌നു സ്വാമിത്(റ) നിവേദനം ചെയ്യുന്നു: ''ഞങ്ങള്‍ അല്ലാഹുവിന്റെ പ്രവാചകനോട് ഉടമ്പടി ചെയ്തിട്ടുണ്ട്. ദാരിദ്ര്യത്തിലും അഭിവൃദ്ധിയിലും പ്രീതിയിലും അപ്രീതിയിലും (ഭരണകര്‍ത്താക്കളെ) ഞങ്ങള്‍ കേട്ട് അനുസരിച്ചുകൊള്ളാം. ഞങ്ങളെക്കാള്‍ അനര്‍ഹരെ തെരഞ്ഞെടുക്കുന്നതും അംഗീകരിച്ചേക്കാം. അല്ലാഹുവില്‍ നിന്ന് വ്യക്തമായ തെളിവുമുഖേന സ്ഥിരപ്പെട്ടിട്ടുള്ള കടുത്ത നിഷേധം (കുഫ്‌റ്) ബോധ്യപ്പെട്ടാലല്ലാതെ ഭരണാധിപന്റെ കല്പനകളോട് ഞങ്ങള്‍ വിയോജിക്കുന്നതല്ല. ഞങ്ങള്‍ എവിടെയായിരുന്നാലും സത്യമേ പറയൂ. അല്ലാഹുവിന്റെ കാര്യത്തില്‍ ആരുടേയും യാതൊരു അധിക്ഷേപത്തേയും ഞങ്ങള്‍ ഭയപ്പെടുകയില്ല'' (ബുഖാരി, മുസ്‌ലിം).

         സാമൂഹ്യജീവികളായ നമുക്ക് പലപ്പോഴും രാഷ്ട്രീയ-മത നേതാക്കളെ അനുസരിക്കേണ്ടതായും അംഗീകരിക്കേണ്ടതായും വരും. ഇക്കൂട്ടത്തില്‍ നാമിഷ്ടപ്പെടുന്നവരും അല്ലാത്തവരുമായ വ്യക്തികളുണ്ടാവുക സ്വാഭാവികം. അതുകൊണ്ടുതന്നെ അവരെടുക്കുന്ന തീരുമാനങ്ങളഖിലവും നമുക്കുള്‍ക്കൊള്ളാന്‍ കഴിഞ്ഞുകൊള്ളണമെന്നില്ല. സ്വാതന്ത്രചിന്തയും ബുദ്ധിയും തീരുമാനങ്ങളുമുള്ള വ്യക്തികളായിരിക്കെ ഓരോരുത്തരുടെയും അഭിപ്രായങ്ങള്‍ വ്യത്യസ്തമായിരിക്കുകയും ചെയ്യും. ഒരേ വിഷയത്തിലെ വ്യത്യസ്താഭിപ്രായങ്ങളെ സമന്വയിപ്പിച്ചുകൊണ്ടുപോവുകയെന്നത് ഭരണപാടവം തന്നെയാണ്. ഈ പാടവം എപ്പോഴും എല്ലാവര്‍ക്കും ഉണ്ടായിക്കൊള്ളണമെന്നില്ലല്ലോ.

         വ്യക്തികള്‍ കുടുംബങ്ങളും കുടുംബങ്ങള്‍ സമൂഹവുമാവുമ്പോള്‍ എല്ലാവരുടെയും  അഭിരുചികളും  താത്പര്യങ്ങളും സംരക്ഷിക്കപ്പെട്ടുകൊള്ളണമെന്നില്ല. സമൂഹത്തിലെ ഒരംഗം തന്റെ താല്പര്യം-അഭിപ്രായം-അംഗീകരിക്കപ്പെടണമെന്ന് ശാഠ്യം പിടിക്കുന്നത് സമൂഹത്തിന്റെ സുസ്ഥിതിക്ക് ഹാനികരമായി ഭവിച്ചേക്കാം. അതിനാല്‍ അയാളുടെ അഭിപ്രായം എത്ര ഫലവത്തായാലും ചിലപ്പോള്‍ സ്വീകരിക്കാന്‍ കഴിഞ്ഞില്ലെന്ന് വരാം. ഒരുപക്ഷെ ഭരണ നേതൃത്വത്തെ തെരഞ്ഞെടുക്കുന്നതിലും ഈ അഭിപ്രായ ഭിന്നത പ്രകടമായേക്കാം. തങ്ങളെയപേക്ഷിച്ച് അനര്‍ഹരായിരിക്കാം ഭരണസാരഥ്യം വഹിക്കുന്നത്. എങ്കില്‍പ്പോലും ഒരു വിശ്വാസി ഇത്തരം ഘട്ടങ്ങളില്‍ ഭരണാധികാരിയില്‍ കടുത്ത നിഷേധം-കുഫ്‌റ്-ബോധ്യപ്പെടാത്തിടത്തോളം അയാളുടെ ആജ്ഞാ നിര്‍ദേശങ്ങള്‍ മാനിക്കേണ്ടതുണ്ടെന്ന് ഈ നബിവചനം വ്യക്തമാക്കുന്നു. ഭരണനേതൃത്വത്തിന്നെതിരെ ഉപജാപക സംഘമുണ്ടാക്കാന്‍ പാടില്ലാത്തതു പോലെ, തന്നെക്കുറിച്ച് ഭിന്നാഭിപ്രായം പ്രകടിപ്പിച്ച വ്യക്തികള്‍ക്കെതിരെ അയാള്‍ വ്യക്തമായും തെറ്റുചെയ്യാത്തിടത്തോളം അയാള്‍ക്കെതിരെ ഭരണാധികാരി കടുത്ത നിലപാടുകളോ പ്രതികാര നടപടിയോ സ്വീകരിക്കാവതുമല്ല. മിക്കവാറും നമ്മുടെ മത-രാഷ്ട്രീയ നേതൃത്വം പാളിപ്പോവുന്നതിവിടെയാണ്. വാളുകൊണ്ടുതന്നെ താങ്കളെ തിരുത്തുമെന്ന് പറഞ്ഞ സ്വഹാബിയോട് ഇസ്‌ലാമിന്റെ ഖലീഫ പ്രതികാരം ചെയ്തതായോ ആ സ്വഹാബിയെ അനഭിമതനായി പ്രഖ്യാപിച്ചതായോ ചരിത്രം രേഖപ്പെടുത്തിയിട്ടില്ല. തങ്ങളുടെ ബന്ധുക്കളും അടുത്തവരും കുറ്റം ചെയ്താല്‍ ശിക്ഷിക്കാതിരിക്കുകയും മറ്റുള്ളവരാണ് കുറ്റക്കാരെങ്കില്‍ കഠിനമായി ശിക്ഷിക്കുകയും ചെയ്തതായിരുന്നു ഇസ്രായീല്യരെ അല്ലാഹു ശപിക്കാന്‍ കാരണമായി നബി(സ) പറഞ്ഞത്.

          അന്ത്യദിനത്തില്‍ സൂര്യന്‍ കത്തിനില്‍ക്കെ ചുട്ടുപൊള്ളുന്ന സന്ദര്‍ഭത്തില്‍ അല്ലാഹു നല്‍കുന്ന തണലുമാത്രം ലഭിക്കുന്ന ഏഴുവിഭാഗങ്ങളിലെ ഒരു വിഭാഗം നീതിമാനായ നേതാവാണെന്ന പ്രവാചക വചനം കൂടി ചേര്‍ത്തുവായിക്കുമ്പോള്‍ നേതാവിന്റെ സാമൂഹ്യബാധ്യത സുതാരാം വ്യക്തമാവും. 'തങ്ങള്‍ എവിടെയായിരുന്നാലും സത്യം മാത്രമേ പറയൂ'വെന്ന പ്രതിജ്ഞ അതുപോലെത്തന്നെ പ്രസക്തമാണ്. 'ഏറ്റവും ഉത്തമമായ സമരം അതിക്രമിയായ അധികാരിയുടെ മുമ്പില്‍ സത്യം പറയലാണെ'ന്നും 'നീ സത്യം പറയുക; അതെത്ര കയ്‌പേറിയതാണെങ്കിലു'മെന്നുമൊക്കെയുള്ള പ്രവാചകാധ്യാപനങ്ങള്‍ ഇവിടെ പ്രസ്താവ്യമാണ്. സത്യം പറഞ്ഞുവെന്നതിനാല്‍ കഷ്ടനഷ്ടങ്ങള്‍ അനുഭവിക്കേണ്ടിവന്നാല്‍ തന്നെ ദൈവസന്നിധിയില്‍ അതുകൂടുതല്‍ പ്രതിഫലാര്‍ഹമാവും.

         അല്ലാഹുവിന്റെ മതത്തിന്റെ പ്രബോധന ദൗത്യം ഏറ്റെടുത്ത ഒരു വിഭാഗമായ നമ്മുടെ ബാധ്യത വര്‍ദ്ധമാനമാണ്. സുസംഘടിതവും സുശക്തവുമായ ഒരു സമൂഹസൃഷ്ടിക്കനിവാര്യമായ നിബന്ധനകളിലൊന്നത്രെ ഉദ്ധൃത പ്രവാചക വചനം. ഇത്തരം നിബന്ധനകളുടെ താളാത്മകമായ സമന്വയം സാധ്യമായെങ്കില്‍ മാത്രമേ ഉപരിസൂചിത സമൂഹസൃഷ്ടി സുസാധ്യമാവൂ. അത്തരമൊരു സമൂഹത്തിന് മാത്രമേ നിലനില്‍പുണ്ടാവൂ. നിലനില്‍പ്പുള്ള വിഭാഗങ്ങള്‍ക്കേ ഇതര ജനവിഭാഗങ്ങളുടെ മനസ്സില്‍ മതിപ്പുളവാക്കാന്‍ കഴിയൂ. ഇസ്‌ലാമിനെ സംബന്ധിച്ച് മതിപ്പുണ്ടാക്കുന്നതില്‍ വിജയിക്കാന്‍ കഴിഞ്ഞില്ലെങ്കില്‍ പ്രബോധനയത്‌നങ്ങളും പരാജയമടയാനാണ് സാധ്യത.

Saturday, May 21, 2016

ബറാ‌ത്ത് രാവ്










































Tuesday, May 17, 2016

പ്രവാചക വൈദ്യത്തിനു മറവിൽ കൊഴുക്കുന്ന ചൂഷണ വ്യവസായം

 പ്രവാചക വൈദ്യത്തിനു മറവിൽ കൊഴുക്കുന്ന ചൂഷണ വ്യവസായം




സി മുഹമ്മദ് സലീം സുല്ലമി
(ശബാബ് വാരിക 2016 ഏപ്രിൽ 22)

ഡോ. അബ്ദുല്ല ഫൗണ്ടേഷന്‍ എന്ന പേരില്‍ ചികിത്സാസ്ഥാപനം നടത്തുന്ന കാരന്തൂര്‍ സ്വദേശി കോഴിക്കോട് പോലീസ് പിടിയിലായ വാര്‍ത്ത വാര്‍ത്താ മാധ്യമങ്ങളില്‍ വലിയ പ്രാധാന്യം നേടുകയുണ്ടായി. പ്രവാചക വൈദ്യ ചികിത്സയുടെ മറവില്‍ പത്തുവര്‍ഷത്തോളമായി കാന്‍സറടക്കമുള്ള രോഗങ്ങള്‍ക്ക് ഇയാള്‍ ചികിത്സ നടത്തിവരികയായിരുന്നു. യുനാനി, അലോപ്പതി, ഹോമിയോ മരുന്നുകള്‍ ഉപയോഗിച്ചായിരുന്നു ചികിത്സ. തെറ്റായ നിര്‍ദേശവും ചികിത്സയും നല്കിയതു മൂലം രോഗം മൂര്‍ച്ഛിച്ച് ഗുരുതരാവസ്ഥയിലായ സംഭവങ്ങള്‍ വരെയുണ്ടായിട്ടുണ്ട്. ഇയാളുടെ വാചകക്കസര്‍ത്തില്‍ മയങ്ങി ചികിത്സയില്‍ വിശ്വസിച്ച് ഡയാലിസിസ് നിര്‍ത്തിവെച്ച രോഗികള്‍ പോലുമുണ്ടായിരുന്നെന്ന് അന്വേഷണത്തില്‍ വ്യക്തമായിട്ടുണ്ട്. കോഴിക്കോട് ബീച്ച് ആശുപത്രിക്കു സമീപത്തെ വാടകക്കെട്ടിടത്തില്‍ ചികിത്സയ്‌ക്കൊപ്പം അനധികൃതമായി പ്രവാചക വൈദ്യത്തില്‍ മെഡിക്കല്‍ ബിരുദ കോഴ്‌സും ഇയാള്‍ നടത്തിയിരുന്നുവത്രെ. മതരാഷ്ട്രീയ രംഗങ്ങളിലെ പ്രമുഖരുമായി ബന്ധം സ്ഥാപിച്ച് പൊതുപരിപാടികള്‍ സംഘടിപ്പിച്ച് അതിന്റെ ഫോട്ടോകള്‍ പ്രദര്‍ശിപ്പിച്ച് വിശ്വാസ്യത സൃഷ്ടിച്ചാണ് ഇയാള്‍ തട്ടിപ്പ് നടത്തിയത്.
ഷാഫി സുഹൂരി എന്ന കാരന്തൂര്‍ പൂളക്കണ്ടി പി കെ മുഹമ്മദ് ഷാഫിയാണ് പോലീസ് അറസ്റ്റിലായ വ്യാജന്‍. ഇയാള്‍ നിരവധി സ്ത്രീകളെ ലൈംഗികമായും സാമ്പത്തികമായും ചൂഷണം ചെയ്തതായി പൊലീസ് പറയുന്നു. ഷാഫിയുടെ പീഡനത്തിനിരയായ യുവതിയുടെ പരാതി പ്രകാരമായിരുന്നു അറസ്റ്റ്. പീഡനത്തിനിരയായ സ്ത്രീകള്‍ മാനഹാനി ഭയന്ന് പരാതിപ്പെടാതിരുന്നതിനാലാണ് ഷാഫിയുടെ 'വ്യാജചികിത്സ' ഇത്രയും കാലം പുറംലോകമറിയാതെ പോയതെന്നാണ് സൂചന. കുറ്റിക്കാട്ടൂരിലുള്ള ഇയാളുടെ കേന്ദ്രത്തിലും പലരും തട്ടിപ്പിന് വിധേയമായിരുന്നു. ഇതിനെതിരെ ഇദ്ദേഹത്തിന്റെ ശിഷ്യര്‍ തന്നെ രംഗത്ത് വന്നിരുന്നു.
മതത്തെയും പ്രവാചക വൈദ്യത്തെയും ദുരുപയോഗം ചെയ്താണ് സുഹൂരി ലൈംഗിക പീഡന മടക്കമുള്ള തട്ടിപ്പുകള്‍ നടത്തിയത്. ഇതൊരു ഒറ്റപ്പെട്ട സംഭവമല്ല. പ്രവാചക വൈദ്യം, ആത്മീയ ചികിത്സ, ഖുര്‍ആന്‍ തെറാപ്പി, സ്പിരിച്വല്‍ സൈക്ക്യാട്രി തുടങ്ങിയ പല പേരുകളില്‍ മതത്തിന്റെ മറവിലുള്ള ചികിത്സ തട്ടിപ്പുകള്‍ വ്യാപകമായി കൊണ്ടിരിക്കുകയാണ്. പ്രവാചകന്‍ നിര്‍ദേശിച്ചതെന്ന പേരില്‍ പല പ്രാകൃത ചികിത്സാമുറകളും പ്രചരിപ്പിക്കാനും മരുന്നുകള്‍ വിപണിയിലിറക്കി വ്യാപാരം നടത്താനും ചില കേന്ദ്രങ്ങള്‍ തുനിഞ്ഞിറങ്ങിയിരിക്കുന്നു. ഈ സാഹചര്യത്തില്‍ പ്രവാചക വൈദ്യത്തെ സംബന്ധിച്ചുള്ള വിശദമായ പഠനം പ്രസക്തമായിരിക്കുന്നു.

അത്ത്വിബ്ബുന്നബവ്വിയ്യ് അഥവാ പ്രവാചകവൈദ്യം എന്ന ഒരു ശാസ്ത്രം നിലവിലുണ്ട്. നബി(സ) സ്വീകരിച്ച ചികിത്സാ രൂപങ്ങളും അവിടുത്തെ ചികിത്സാ സംബന്ധമായ നിര്‍ദേശങ്ങളും ഉള്‍ക്കൊള്ളുന്നതാണ് ഇത്. നബി(സ) ജീവിച്ചിരുന്ന കാലഘട്ടത്തില്‍ നിലനിന്നിരുന്ന ചികിത്സാകാര്യങ്ങളും പൗരാണികമായ രീതികളും ഉള്‍ക്കൊള്ളുന്നതോടൊപ്പം ശാശ്വതമായ ചില വൈദ്യശാസ്ത്ര തത്വങ്ങളും ഇതില്‍ കാണാവുന്നതാണ്. പ്രവാചകനില്‍ നിന്ന് നിവേദനം ചെയ്യപ്പെട്ട ഹദീസുകളിലാണ് ഇവയെല്ലാം കാണുന്നത്. വിവിധ ഹദീസ് ഗ്രന്ഥങ്ങളില്‍ പരന്നുകിടക്കുന്ന ഇത്തരം വചനങ്ങള്‍ ചിലര്‍ സമാഹരിക്കുകയും ക്രോഡീകരിക്കുകയും ചെയ്തിട്ടുണ്ട്. ചില ഹദീസ് ഗ്രന്ഥങ്ങള്‍ തന്നെ ത്വിബ്ബ് അഥവാ വൈദ്യം എന്ന പേരില്‍ പ്രത്യേകം തലക്കെട്ടുകള്‍ നല്‍കി ക്രോഡീകരിച്ചവരുമുണ്ട്. ഇമാം ബുഖാരി തന്റെ സ്വഹീഹുല്‍ ബുഖാരിയില്‍ കിതാബുത്ത്വിബ്ബ് എന്ന പേരില്‍ നൂറിലേറെ ഹദീസുകള്‍ വിവിധ തലക്കെട്ടുകളിലായി ക്രോഡീകരിച്ചിട്ടുണ്ട്. 
ഇത്തരം ഹദീസുകള്‍ മാത്രം ശേഖരിച്ച് ക്രോഡീകരിക്കുകയും പ്രത്യേക ഗ്രന്ഥരൂപത്തില്‍ അവ രേഖപ്പെടുത്തുകയും ചെയ്ത നിരവധി പേരുണ്ട്. അവരില്‍ ഏറ്റവും പൗരാണികനാണ് ഇമാം അലിയ്യുബ്‌നു മൂസാ അല്‍ കാദ്വിം ബ്‌നു ജഅ്ഫര്‍ അസ്സ്വാദിഖ് (മരണം ഹി. 203). ഇദ്ദേഹം ഖലീഫ മഅ്മൂനിന് സമര്‍പ്പിക്കാനാണ് ഇത്തരമൊരു ഗ്രന്ഥരചന നടത്തിയത്. 

ഹിജ്‌റ 238-ല്‍ മൃതിയടഞ്ഞ ഇമാം അബ്ദുല്‍ മാലികില്‍ ഉന്‍ദുലുസി, ഹിജ്‌റ 368-ല്‍ നിര്യാതനായ ഹാഫിദ് അബൂബക്കര്‍ ഇബ്‌നുസ്സനിയ്യ് തുടങ്ങി ഒട്ടേറെ പേരെ ഇങ്ങനെ കാണാവുന്നതാണ്. ഇതില്‍ പില്‍ക്കാലത്ത് വന്ന രചനകളാണ് ഇമാം ദഹബിയുടെയും (മരണം ഹി.748) ഇബ്‌നുല്‍ഖയ്യിമിന്റെയും (മരണം ഹി. 751) ഇമാം സുയൂത്വിയുടെയും (മരണം ഹി. 911) ഗ്രന്ഥങ്ങള്‍. ഇതില്‍ ഇബ്‌നുല്‍ഖയ്യിമിന്റെ ത്വിബ്ബുന്നബവിയ്യ് എന്ന പേരില്‍ പ്രസിദ്ധമായ ഗ്രന്ഥം അദ്ദേഹത്തിന്റെ സാദുല്‍മആദ് എന്ന നബിചര്യാ ഗ്രന്ഥത്തിന്റെ നാലാമത്തെ വാള്യമായി എഴുതപ്പെട്ടതാണ്. 
പ്രവാചക ജീവിതത്തിലെ വിവിധ രംഗങ്ങളിലുള്ള മാതൃകകള്‍ വിശദമായി ചര്‍ച്ച ചെയ്യുന്ന അദ്ദേഹം നബി(സ) ചികിത്സാ മേഖലയില്‍ സ്വീകരിച്ച നിലപാടുകളും മറ്റുളളവര്‍ക്ക് അവിടുന്ന നിര്‍ദേശിച്ച ചികിത്സാക്രമങ്ങളുമെല്ലാം വിശദമായി പ്രതിപാദിക്കുന്നുണ്ട്. അഞ്ഞൂറോളം പുറങ്ങളുളള ഈ ഗ്രന്ഥത്തില്‍ നൂറ്റി അന്‍പതിലേറെ ശീര്‍ഷകങ്ങളിലായി നബി(സ) നടത്തിയതും നിര്‍ദേശിച്ചതുമായ ചികിത്സാമുറകളും തത്വങ്ങളും, തന്റെ കാലഘട്ടത്തിലെ വിജ്ഞാനങ്ങളുമായി ചേര്‍ത്തുകൊണ്ട് ചര്‍ച്ച ചെയ്യുന്നുണ്ട്. ഏറെ വിജ്ഞാനപ്രദമായ ഈ ഗ്രന്ഥം പ്രവാചക വൈദ്യത്തിന്റെ മഹിമ വിളിച്ചോതുന്നതാണ്.


നബി(സ) നിയുക്തനായിട്ടുളളത് വൈദ്യശാസ്ത്രം അഭ്യസിപ്പിക്കുവാനല്ല. പ്രത്യുത മാനവതയ്ക്കാകമാനം ദൈവിക സന്ദേശത്തിന്റെ മാര്‍ഗദര്‍ശനം പകര്‍ന്നുകൊടുക്കാനാണ്. അതില്‍ തന്നെ, പാരത്രിക ജീവിതത്തില്‍ വിജയം വരിക്കാനാവശ്യമായ വിശ്വാസം, ആരാധന, അനുഷ്ഠാന കാര്യങ്ങള്‍ പ്രത്യേകമായി പഠിപ്പിക്കുകയും അതോടൊപ്പം മനുഷ്യജീവിതത്തിന്റെ ഇതര മേഖലകളില്‍ അനുവര്‍ത്തിക്കേണ്ട ദൈവികമായ മാര്‍ഗദര്‍ശനം എന്തെന്ന് പഠിപ്പിക്കുകയും ചെയ്യുന്നു. 
മനുഷ്യജീവിതത്തിന്റെ മുഴുവന്‍ മേഖലകളിലേക്കും ദൈവികമായ മാര്‍ഗദര്‍ശനം നല്‍കുമ്പോള്‍ രോഗവും ചികിത്സയുമായി ബന്ധപ്പെട്ട രംഗത്തേക്കും ദൈവികമായ മാര്‍ഗദര്‍ശനം നല്‍കുകയുണ്ടായി. ഇബ്‌നുല്‍ഖയ്യിം(റ) പറയുന്നു: ''പ്രവാചകന്‍ നിയുക്തനായിട്ടുള്ളത് അല്ലാഹുവിലേക്കും അവന്റെ സ്വര്‍ഗത്തിലേക്കും ക്ഷണിക്കുന്നവനും വഴികാട്ടിയുമായിട്ടാണ്. എന്നാല്‍, വൈദ്യം അവിടുത്തെ ശരീഅത്തിന്റെ പൂര്‍ത്തീകരണത്തിന്റെ ഭാഗമാണ്. ആവശ്യമാകുമ്പോള്‍ ഉപയോഗിക്കുക എന്ന നിലക്ക് മാത്രം. ആവശ്യമായി വരുന്നില്ലെങ്കില്‍ ആത്മീയവും മാനസികവുമായ പരിപോഷണത്തിന് ശ്രദ്ധ തിരിക്കുകയും അത്തരം രോഗങ്ങളില്‍ നിന്ന് പ്രതിരോധിക്കുകയുമാണ് വേണ്ടത്'' (ത്വിബ്ബുന്നബിയ്യ്, പുറം 24). അപ്പോള്‍ നബി(സ)യില്‍ നിന്ന് വന്ന ശാരീരിക ചികിത്സാ കാര്യങ്ങള്‍ വിലയിരുത്തേണ്ടത് ഇത്തരം ഒരടിത്തറയില്‍നിന്ന് കൊണ്ടായിരിക്കണമെന്നാണ് ഇബ്‌നുല്‍ഖയ്യിമിന്റെ വീക്ഷണം.


വൈദ്യശാസ്ത്രപരമായും ചികിത്സാപരമായും നബി(സ)യില്‍ നിന്ന് വന്ന എല്ലാ നിവേദനങ്ങളും ഇസ്‌ലാമിക ശരീഅത്തിലെ വിശ്വാസ-ആരാധനാ-അനുഷ്ഠാന കാര്യങ്ങള്‍പോലെ അക്ഷരാര്‍ഥത്തില്‍ തന്നെ എടുക്കേണ്ട കാര്യങ്ങളാണോ? അതല്ല, അവിടുന്ന് ജീവിച്ച കാലഘട്ടവുമായി ബന്ധപ്പെട്ടതും താത്ക്കാലികവുമായ നിര്‍ദേശങ്ങളെന്ന നിലക്ക് കാണേണ്ടതാണോ? ഇമാം ഇബ്‌നുല്‍ഖയ്യിം പ്രവാചക വൈദ്യവുമായി ബന്ധപ്പെട്ട വിഷയത്തില്‍ ചര്‍ച്ച തുടങ്ങുമ്പോള്‍ നബിവചനങ്ങളെ രണ്ടു വിഭാഗമായി തിരിച്ചിരിക്കുന്നു. 

എന്നിട്ടദ്ദേഹം പറയുന്നു: ''നബി(സ)യുടെ പ്രസ്താവനകള്‍ രണ്ടു വിധമാണ്. ഒന്ന്, എല്ലാവര്‍ക്കും ഒരുപോലെ ബാധകമായത്. രണ്ട്, പ്രത്യേക സ്ഥലക്കാര്‍ക്ക് മാത്രമായത്. നിങ്ങള്‍ ഖിബ്‌ലയെ അഭിമുഖീകരിച്ചോ പിന്നിട്ടോ മലമൂത്രവിസര്‍ജനം ചെയ്യരുത്, എന്നാല്‍ കിഴക്കോട്ടോ പടിഞ്ഞാറോട്ടോ തിരിയുക എന്ന നബിവചനംപോലെ. ഇതിലെ സംബോധന കിഴക്കോ പടിഞ്ഞാറോ ഇറാഖിലോ ജീവിക്കുന്ന ആളുകള്‍ക്കുള്ളതല്ല. മദീനക്കാര്‍ക്കും അതിനോടു യോജിക്കുന്നവര്‍ക്കുമുള്ളതാണ്. ശാം (സിറിയ) പോലെയുള്ള പ്രദേശങ്ങള്‍ക്കും ഇതേപോലെത്തന്നെയാണ്.'' (ത്വിബ്ബുന്നബവിയ്യ്, പുറം 25,26)

ഈ വിഭജനത്തിനുശേഷം പനിയുമായി ബന്ധപ്പെട്ട ഒരു നബിവചനം അദ്ദേഹം ചര്‍ച്ച ചെയ്യുന്നു: ''തീര്‍ച്ചയായും പനി, അല്ലെങ്കില്‍ പനിയുടെ കാഠിന്യം ജഹന്നമിന്റെ (നരകത്തിന്റെ) ജ്വാലയില്‍ നിന്നുള്ളതാണ്. അതിനാല്‍ നിങ്ങളത് വെള്ളം കൊണ്ട് തണുപ്പിക്കുക'' (ബുഖാരി). ഈ നബിവചനത്തെ ഇബ്‌നുല്‍ഖയ്യിം(റ) ഹിജാസുകാര്‍ക്കും തൊട്ടടുത്തുളള പ്രദേശക്കാര്‍ക്കും മാത്രം ബാധകമായ പ്രസ്താവനയായിട്ടാണ് കാണുന്നത്. കാരണം അവിടുത്തുകാര്‍ക്കുണ്ടാകുന്ന അധിക പനികളും സൂര്യാതപത്തിന്റെ ശക്തിയാല്‍ ഉണ്ടാകുന്നതാണ്. അതിന് കുളിച്ചോ കുടിച്ചോ വെള്ളം കൊണ്ട് തണുപ്പിക്കാവുന്നതാണ്.
വൈദ്യശാസ്ത്രവുമായി ബന്ധപ്പെടുന്ന എല്ലാ നബിവചനങ്ങളും എല്ലാ വ്യക്തികള്‍ക്കും എല്ലാ പ്രദേശത്തുകാര്‍ക്കും ഒരുപോലെ ബാധകമായിരിക്കണമെന്നില്ല എന്ന് ഇതില്‍ നിന്ന് മനസ്സിലാകുന്നു. അതിലെ ചില സൂചനകള്‍ നബി(സ) ജീവിച്ച കാലവും സ്ഥലവുമായി ബന്ധപ്പെട്ടതു മാത്രമാകാവുന്നതാണ്. എന്നാല്‍ 'എല്ലാ രോഗത്തിനും മരുന്നുണ്ട്. രോഗത്തിനുള്ള മരുന്ന് കിട്ടിക്കഴിഞ്ഞാല്‍ അല്ലാഹുവിന്റെ ഉത്തരവോടെ രോഗം ഭേദപ്പെടും' എന്ന നബിവചനമാണ് ഇതില്‍ പൊതുവായും വ്യാപകമായും പരിഗണിക്കേണ്ടത്. ഇതിന്റെ അടിസ്ഥാനത്തില്‍ നബി(സ)യില്‍ നിന്ന് വന്ന ചികിത്സാ നിര്‍ദേശങ്ങള്‍ ചികിത്സയുടെ പ്രാധാന്യം ബോധ്യപ്പെടുത്തുന്നതോ അവിടുത്തെ കാലത്ത് പ്രചാരത്തിലുണ്ടായിരുന്നതോ അല്ലെങ്കില്‍ അതിന്റെയടിസ്ഥാനത്തില്‍ കൂടുതല്‍ ശാസ്ത്രീയ പഠനങ്ങള്‍ നടത്തി ആനുകാലികമാക്കേണ്ടവയായിട്ടോ കാണുകയാണ് വേണ്ടത്.

ആഇശ(റ)യുടെ പ്രസ്താവന ഈ കാര്യം കൂടുതല്‍ വ്യക്തമാക്കുന്നുണ്ട്: ''നബി(സ)ക്ക് അവിടുത്തെ അവസാനകാലത്ത് രോഗം ബാധിച്ചു. അറബികള്‍ നാനാഭാഗത്തു നിന്നും അവിടുത്തെ സന്ദര്‍ശിക്കാനെത്തി. അവര്‍ അവിടുത്തേക്ക് പല ചികിത്സകളും നിര്‍ദേശിക്കും. ഞാന്‍ അതെല്ലാം ഉപയോഗിച്ച് അദ്ദേഹത്തെ ചികിത്സിക്കുമായിരുന്നു.'' (അഹ്മദ്). മറ്റൊരു റിപ്പോര്‍ട്ടില്‍ 'അറബികളും അനറബികളുമായ വൈദ്യന്മാര്‍ നിര്‍ദേശിക്കുന്ന ചികിത്സ അദ്ദേഹത്തിന് ഞങ്ങള്‍ നടത്താറുണ്ടായിരുന്നു' എന്നാണ് വന്നിട്ടുള്ളത് (ഹാകിം). രോഗത്തിന് ചികിത്സിക്കണമെന്നും കൂടുതല്‍ യോഗ്യരായ ചികിത്സരെ കണ്ടെത്തണമെന്നുള്ള പ്രവാചകന്റെ നിര്‍ദേശവും ഈ കാര്യങ്ങള്‍ തന്നെ മനസ്സിലാക്കിത്തരുന്നു.
മുസ്‌ലിംസമൂഹം നബി(സ)യില്‍ നിന്ന് സ്ഥിരപ്പെട്ട ചികിത്സാമുറകള്‍ വര്‍ത്തമാന കാലവുമായി യോജിച്ചവ കണ്ടെത്തുകയോ കൂടുതല്‍ ശാസ്ത്രീയപഠനങ്ങള്‍ നടത്തി അതിലെ വൈദ്യവിധികള്‍ ആനുകാലികമാക്കുകയോ ചെയ്യാന്‍ ശ്രമിക്കുകയാണ് വേണ്ടത്. പ്രവാചകന്റെ ചില ചികിത്സാവിധികള്‍ അവിടുത്തെ പ്രവാചകത്വത്തിന് തന്നെ തെളിവായും വരാവുന്നതാണ്. ഇത്തരം ഒരു രീതി വികസിച്ചുവന്നാല്‍, വിശ്വാസികളെ സംബന്ധിച്ച് കൂടുതല്‍ മനസ്സമാധാനം ലഭിക്കുകയും പ്രവാചകന്റെ ഒരു മാതൃക പിന്‍പറ്റിയ അനുഭവവും രോഗം ശാസ്ത്രീയമായി ചികിത്സിച്ച് ഭേദപ്പെടുത്തിയ അവസ്ഥയും ഒന്നിച്ചുണ്ടാകുന്നതാണ്. എന്നാല്‍ ചികിത്സാ വിഷയത്തില്‍ വന്ന പ്രവാചക നിര്‍ദേശങ്ങള്‍ തികച്ചും മതപരമായ ഒരു കാര്യമായി പരിഗണിക്കേണ്ടതുണ്ടോ എന്നത് ആലോചിക്കേണ്ടതാണ്. പൂര്‍വ്വകാല പണ്ഡിതന്മാരില്‍ ചിലര്‍ അവ ഒരു ശര്‍ഇയായ നിയമമായി പരിഗണിക്കേണ്ടതില്ലെന്ന വീക്ഷണം വെച്ചു പുലര്‍ത്തിയതായി കാണാവുന്നതാണ്. ആധുനികരായ യൂസുഫുല്‍ ഖറദാവിയും മഹ്മൂദ് ശല്‍തൂതും ഇത്തരം കാര്യങ്ങളൊന്നും മതപരമായ നിര്‍ദേശമായി പരിഗണിക്കേണ്ടതില്ലെന്ന പക്ഷക്കാരാണ്. 

 പ്രവാചക വൈദ്യത്തിന് സുപ്രധാനമായ മൂന്ന് അടിത്തറകള്‍ കാണാവുന്നതാണ്. ഇബ്‌നുല്‍ഖയ്യിം ഇതിന്റെ ചില വശങ്ങള്‍ വിശദീകരിച്ചിട്ടുണ്ട്. ഒന്ന്, മാനസികശക്തി പകരുന്നവിധം പ്രാര്‍ഥനയും തവക്കുലും മറ്റു പുണ്യകര്‍മ്മങ്ങള്‍ നിര്‍വ്വഹിക്കലും ഇതിന്റെ ഭാഗമായി അദ്ദേഹം കാണുന്നു. ഇത്തരം പുണ്യപ്രവര്‍ത്തനങ്ങള്‍ വഴി ലഭിക്കുന്ന ആശ്വാസം രോഗങ്ങള്‍ക്ക് ശമനം നല്‍കുന്ന കാര്യമാണ്. അനുഭവങ്ങള്‍ ഇതിന്റെ സാധുത തെളിയിക്കുന്നതായി കാണാവുന്നതാണ്. ശരീരത്തിനു നല്‍കുന്ന മരുന്നുകള്‍ക്ക് അതിന്റേതായ സ്വാധീനഫലങ്ങള്‍ ഉണ്ടെങ്കിലും അത് തന്നെയും ദൈവികമായ നിയമത്തിന്റെ അടിസ്ഥാനത്തില്‍ നടക്കുന്നതാണെങ്കിലും പ്രാര്‍ഥനയും തവക്കുലും വഴി മനസ്സ് അതിന്റെ സ്രഷ്ടാവായ നാഥനുമായി സ്ഥാപിക്കുന്ന ബന്ധത്തിലൂടെ നേടുന്ന സമാധാനവും ആശ്വാസവും മരുന്നുകളെക്കാളും മീതെയാണ്. മനസ്സിന്റെ ശക്തി വര്‍ധിക്കുന്തോറും രോഗത്തിന്റെ മേല്‍ അത് വിജയം വരിക്കുകയാണ് ചെയ്യുന്നത്. ഇത്തരം കാര്യങ്ങള്‍ നിഷേധിക്കുന്നവര്‍ വൈദ്യവുമായും മനുഷ്യന്റെ യാഥാര്‍ഥ്യവുമായും വളരെ അകന്നവരാണ്. (ത്വിബുന്നബിയ്യ്, പുറം 12)
രണ്ട്: പ്രതിരോധത്തിന്റെയും സംരക്ഷണത്തിന്റെയും രീതിയാണ്. ഇസ്‌ലാം നിര്‍ദേശിക്കുന്ന വൃത്തിയുടെയും ശുദ്ധിയുടെയും കാര്യങ്ങള്‍ ഇതില്‍ ഉള്‍പ്പെടുന്നു. ആത്മീയമായ പശ്ചാത്താപം സ്വീകരിക്കുന്നവരെയും ശാരീരികവും ഭൗതികവുമായ ശുദ്ധീകരണം നടത്തുന്നവരെയും അല്ലാഹു ഇഷ്ടപ്പെടുന്നതായി ഖുര്‍ആന്‍ പ്രഖ്യാപിക്കുന്നു (2:222). രോഗികള്‍ക്ക് നല്‍കുന്ന ഇളവുകളും മതവിധികളിലെ ലഘൂകരണവും ഇതിന്റെ ഭാഗമായിത്തന്നെ കാണേണ്ടതാണ്. അതോടൊപ്പംതന്നെ, ഭക്ഷണകാര്യത്തില്‍ ഒരിക്കലും അമിതത്വം വരാതെ സൂക്ഷിക്കാനുള്ള നിര്‍ദേശവും ആരോഗ്യ കാര്യവുമായി ബന്ധപ്പെട്ടുതു തന്നെ. ഇബ്‌നുല്‍ഖയ്യിം(റ) ഭക്ഷണക്രമത്തെ മൂന്നായി വിഭജിക്കുന്നു. ഒന്ന്: ആവശ്യത്തിന് മാത്രമുള്ള ഭക്ഷണം. രണ്ട്: തികഞ്ഞ ഭക്ഷണം മൂന്ന്: ആവശ്യത്തിലും കവിഞ്ഞ് നല്‍കുന്നത്. ഇതില്‍ ഒന്നാമത്തേതാണ് ഒരാള്‍ക്ക് അവകാശപ്പെട്ടതും ആരോഗ്യകരമായതും. 

ഇസ്‌ലാം നിഷിദ്ധമാക്കിയ ഭക്ഷണ പദാര്‍ഥങ്ങളും പാനീയങ്ങളും വര്‍ജിക്കുന്നതും പ്രതിരോധത്തിന്റെ ഇനത്തില്‍ തന്നെയാണ് ഉള്‍പ്പെടുന്നത്. ലഹരി ഉപയോഗവും ശവം തിന്നുന്നതും പന്നിമാംസം കഴിക്കുന്നതും രക്തം കുടിക്കുന്നതുമെല്ലാം ഇതില്‍പ്പെടുന്നു. പകരാന്‍ സാധ്യതയുള്ള പ്ലേഗ് പോലെയുള്ള രോഗങ്ങളില്‍ നിന്ന് അകന്ന് നില്‍ക്കാന്‍ പ്രവാചകന്‍ കല്‍പിച്ചത് പ്രത്യേകം ശ്രദ്ധേയമാണ്.

മൂന്ന്: രോഗത്തിന്റെ ഭൗതികമായ കാരണങ്ങള്‍ കണ്ടെത്തി അതിനനുഗുണമായ ചികിത്സ നല്‍കുക എന്നതാണ്. ഇത്തരം ചികിത്സ പ്രവാചകന്‍ പ്രത്യേകം നിര്‍ദേശിച്ചതാണ്. എല്ലാ രോഗത്തിനും ചികിത്സയുണ്ട്. രോഗത്തിനുളള ഔഷധം ലഭിച്ചുകഴിഞ്ഞാല്‍ അല്ലാഹുവിന്റെ ഉത്തരവോടെ രോഗം ഭേദപ്പെടുമെന്ന് റസൂല്‍(സ) പറയുന്നുണ്ട് (മുസ്‌ലിം). ''ചികിത്സയല്ലാത്ത ഒരു രോഗത്തെയും അല്ലാഹു നല്കിയിട്ടില്ല'' (ബുഖാരി) എന്ന നബിവചനവും ഇതു മനസ്സിലാക്കിത്തരുന്നു.

ഇതിന്റെയടിസ്ഥാനത്തില്‍ വെള്ളം ദാഹത്തെയും ഭക്ഷണം വിശപ്പിനെയും അകറ്റുന്നതുപോലെ മരുന്ന് രോഗത്തെയും അകറ്റുന്നു. അതുപോലെ ഓരോ രോഗത്തിനും അതിനു ലഭിക്കേണ്ട പ്രത്യേക ചികിത്സയും മരുന്നും ലഭിക്കുമ്പോഴാണ് അല്ലാഹുവിന്റെ ഉത്തരവനുസരിച്ച് രോഗം ഭേദപ്പെടുന്നത്. അപ്പോള്‍ രോഗചികിത്സയെക്കുറിച്ച് പഠിച്ച് മരുന്ന് കണ്ടെത്തുകയെന്നത് ഇസ്‌ലാം നിര്‍ദേശിക്കുന്ന കാര്യമായി മാറുന്നു. കാര്യകാരണങ്ങളെ ബന്ധിപ്പിച്ച് നടത്തുന്ന ഇത്തരം ചികിത്സാ രീതികളെ ഇസ്‌ലാം അംഗീകരിക്കുകയും പ്രോത്സാഹിപ്പിക്കുകയും ചെയ്യുന്നു. ഇത്തരം രീതികള്‍ ഇസ്‌ലാം പഠിപ്പിക്കുന്ന, വൈദ്യത്തില്‍ ഭരമേല്‍പിക്കുക (തവക്കുല്‍) എന്ന വിശ്വാസപ്രശ്‌നത്തെ ഒരിക്കലും ബാധിക്കുകയോ നിഷേധിക്കുകയോ ചെയ്യുന്നുമില്ല. മേല്‍ പ്രസ്താവിച്ച മൂന്നു തത്വങ്ങളും ആധുനിക കാലഘട്ടത്തിലും രോഗചികിത്സാരംഗത്ത് പ്രസക്തമായി നില്‍ക്കുന്നുവെന്ന് കാണാവുന്നതാണ്.


രോഗവും ചികിത്സയുമായി ബന്ധപ്പെട്ടുനില്ക്കുന്ന അന്ധവിശ്വാസങ്ങള്‍ അനവധിയാണ്. ഭൂത-പ്രേതാദികളുടെയും ജിന്ന് റൂഹാനികളുടെയും പ്രവര്‍ത്തനഫലമാണ് രോഗങ്ങള്‍ ബാധിക്കുന്നതെന്ന വിശ്വാസം മുന്‍പത്തെപ്പോലെ ഇന്നും നിലനില്ക്കുന്നുണ്ട്. ഏതെങ്കിലും വനദേവതകളുടെയോ ചാത്തന്മാരുടേയോ പരേതാത്മാക്കളുടേയോ ശാപ കോപങ്ങളാണ് രോഗകാരണമെന്ന് വിശ്വസിക്കുന്നവരാണ് വനവാസികള്‍. ഇത്തരം രോഗങ്ങള്‍ ഭേദമാക്കാന്‍ ഈ ദൈവങ്ങളെയും ആത്മാക്കളെയും പ്രീതിപ്പെടുത്താനാവശ്യമായ മന്ത്രതന്ത്രങ്ങളും പ്രാര്‍ഥനാകീര്‍ത്തനങ്ങളും ബലിതര്‍പ്പണങ്ങളും ഇവര്‍ നടത്തുന്നു. ഇതില്‍ ചിലപ്പോള്‍ മനുഷ്യബലി വരെ ഉള്‍പ്പെടുന്നു.

ഏതു രോഗവും ഇങ്ങനെയുള്ള അദൃശ്യശക്തികളുടെ ശാപ കോപ ഫലമായുണ്ടാകുന്നതാണെന്ന വിശ്വാസം എല്ലാ സമുദായങ്ങളിലുമുണ്ട്. ചെകുത്താന്മാരും റൂഹാനികളുമാണ് രോഗം പരത്തുന്നതെന്ന വിശ്വാസം മുസ്‌ലിം സമുദായത്തിലുമുണ്ട്. വസൂരി രോഗത്തിന് കുരിപ്പ് ചെയ്ത്താന്‍ എന്ന പേര് വന്നത് ഇങ്ങനെയാണ്. ശൈത്വാനും റൂഹാനിയുമെല്ലാം തനിക്ക് പറ്റിയവരുടെ ദേഹത്ത് കയറി കൂടുമെന്നും എന്നിട്ട് അവരുദ്ദേശിക്കുന്നവിധം അയാളെക്കൊണ്ട് ചെയ്യിക്കുമെന്നും വിശ്വസിക്കുന്നു. ഇത്തരം ആളുകള്‍ പല കോപ്രായങ്ങളും ഗോഷ്ടികളും കാണിക്കുന്നു. സ്ത്രീകളെയാണ് ഇത് കൂടുതലായും ബാധിക്കാറുള്ളത്. ഇവരെ ചികിത്സിക്കുന്നതിന് ചെകുത്താനിറക്കുകയെന്നാണ് പറയപ്പെടുന്നത്. അടിച്ചും തൊഴിച്ചും മന്ത്രിച്ചും നടത്തുന്ന ഈ ചികിത്സാരീതി തനിപ്രാകൃതം തന്നെയാണ്. എന്നാല്‍ ആധുനിക കാലത്തും ഇത്തരം വിശ്വാസങ്ങളും ചികിത്സകളും നിലനില്ക്കുന്നുവെന്നുള്ളത് അന്ധവിശ്വാസങ്ങള്‍ കാലദേശങ്ങള്‍ക്കതീതമായി ഉണ്ടാകുന്നുവെന്ന് ബോധ്യപ്പെടുത്തുകയാണ്.

രോഗ ചികിത്സയുടെ കേന്ദ്രങ്ങളായി അറിയപ്പെടുന്നവയാണ് ആത്മീയ കേന്ദ്രങ്ങള്‍. ഹൈന്ദവ- ക്രൈസ്തവ-മുസ്‌ലിം സമൂഹങ്ങള്‍ക്കിടയില്‍ ഇത്തരം കേന്ദ്രങ്ങള്‍ക്ക് ഇന്നും പ്രചാരം കൂടിവരികയാണ്. തിരക്കുപിടിച്ച ആധുനിക ജീവിതത്തിനിടയില്‍ സ്വസ്ഥതയും സമാധാനവും നഷ്ടപ്പെടുന്ന മനുഷ്യന്‍ മനസ്സമാധാനത്തിനും ആത്മശാന്തിക്കുമായി എത്തിച്ചേരുന്നത് ഇത്തരം ഇടങ്ങളിലാണ്. ജാതിമത ഭേദമന്യേ സ്ത്രീകളും പുരുഷന്മാരും ഇത്തരം കേന്ദ്രങ്ങള്‍ തേടിയെത്തുന്നു. എല്ലാ കേന്ദ്രങ്ങളിലും അതാതു മതത്തിന്റെ പ്രത്യേക പ്രാര്‍ഥനകളും കീര്‍ത്തനങ്ങളും ഉരുവിടുകയും അവരുടെ ആരാധ്യപുരുഷനെ രക്ഷകനായി മനസ്സില്‍ ധ്യാനിച്ചു പ്രാര്‍ഥനാനിരതരായി കഴിച്ചുകൂട്ടുമ്പോള്‍ അനുഭവപ്പെടുന്ന താത്കാലിക മുട്ടുശാന്തി രോഗ ശമനവും ആരാധ്യപുരുഷന്റെ അനുഗ്രഹവുമായി ചിത്രീകരിക്കുകയാണ് ചെയ്യപ്പെടുന്നത്.
ക്രൈസ്തവ സമൂഹം നടത്തുന്ന ധ്യാന കേന്ദ്രങ്ങളില്‍ യേശുവിനെ മനസ്സില്‍ ധ്യാനിച്ച് സര്‍വവും യേശുവിലര്‍പ്പിച്ച് അതിവേദം നടത്തുന്ന പ്രാര്‍ഥന-കീര്‍ത്തനങ്ങള്‍ക്കിടയില്‍ അക്ഷരസ്ഫുടതയില്ലാതെ പുറത്തുവരുന്ന ശബ്ദങ്ങള്‍ ഭാഷാവാരം (അന്യഭാഷ) ആണെന്ന് വിശ്വസിപ്പിച്ച് വിശ്വാസികളെ ആശ്വസിപ്പിക്കുന്നു. വ്യാപകമായ കളവു പ്രചാരമാണ് ഇത്തരം ധ്യാനകേന്ദ്രങ്ങളുടെ മുതല്‍ മുടക്ക്. 

ആത്മീയമായ മുട്ടുശാന്തിക്കു പുറമെ ശാരീരികമായ വൈകല്യങ്ങള്‍പോലും ഇത്തരം കേന്ദ്രങ്ങള്‍ നിമിഷനേരം കൊണ്ട് ഭേദമാക്കിവിടുന്നുവെന്നുള്ളത് അത്യത്ഭുതകരമാണ്. ടെലിവിഷന്‍ ചാനലുകള്‍ വഴിയും ഇത്തരം ചികിത്സകള്‍ക്ക് പ്രചാരണം സിദ്ധിക്കുന്നു. കാലിനുമുടന്തുമായി വരുന്നയാള്‍ കര്‍ത്താവിനാല്‍ അനുഗൃഹീതനായി, ശുശ്രൂഷകന്റെ കരസ്പര്‍ശമേറ്റു മുടന്തു മാറി നടന്നുപോകുന്ന കാഴ്ച ആരേയും അതിശയിപ്പിക്കുന്നതാണ്. അഭ്യസ്തവിദ്യരും, വൈദ്യശാസ്ത്രം അഭ്യസിച്ചവരും വരെ ഇത്തരം കേന്ദ്രങ്ങളില്‍ എത്തിച്ചേരുന്നുവെന്നുള്ളത് ഈ ചൂഷണത്തിന്റെ ആഴം ബോധ്യപ്പെടുത്തുന്നതാണ്. യഥാര്‍ഥ ഏകദൈവവിശ്വാസത്തിനല്ലാതെ ഇതില്‍ നിന്നൊന്നും മനുഷ്യരെ മോചിപ്പിക്കാനാവുകയില്ലെന്ന് ഇതെല്ലാം തെളിയിക്കുന്നു.
അല്‍ഫോന്‍സാമ്മയുടെ കബറിടത്തിങ്കല്‍ രോഗശാന്തി തേടിയെത്തിയ ബാലന്റെ മുടന്തു മാറിയതും മറ്റനേകം അത്ഭുത പ്രവൃത്തികളും അവരെ വാഴ്ത്തപ്പെട്ടവരായി പ്രഖ്യാപിക്കാന്‍ കാരണമായതത്രേ. മനോരമ ദിനപത്രത്തില്‍  വരുന്ന ഉപകാരസ്മരണയെന്ന പരസ്യം വായിച്ചാല്‍ ക്രൈസ്തവ സമൂഹത്തില്‍ ഇത്തരം മൂഢവിശ്വാസികളുടെ സ്വാധീനം എത്രമാത്രമാണെന്ന് ബോധ്യമാകും. ഹൈന്ദവസമൂഹത്തിലും ഇതിനു സമാനമായ കേന്ദ്രങ്ങളുണ്ട്. മാതാഅമൃതാനന്ദമയിയുടെ തിരുസന്നിധിയില്‍ എത്തി അവരുടെ തിരുപാദങ്ങള്‍ പൂജിച്ചും അനുഗ്രഹം വാങ്ങിയും മനസ്സമാധനവും രോഗശാന്തിയും നേടുന്നവരുടെ വ്യാപ്തി എത്രയാണെന്ന് മീഡിയ അറിയിച്ചുതരുന്നുണ്ട്. രാജ്യത്തിന്റെ അതിര്‍ത്തികള്‍ പോലും കടന്നു ഭക്തജനങ്ങള്‍ ഇവിടേക്ക് ഒഴുകുകയാണ്. അന്ധവിശ്വാസങ്ങളുടെ സ്വാധീനത്തിനു ഒരതിരും ബാധകമല്ലതന്നെ.
മുസ്‌ലിം സമൂഹത്തിലും ഇതിനു സമാനമായ കേന്ദ്രങ്ങള്‍ ഉയര്‍ന്നു വന്നിട്ടുണ്ട്. ക്വുര്‍ആന്‍ തെറാപ്പിയെന്നും കൗണ്‍സലിംഗ് എന്നും പേരുപറഞ്ഞ് നടത്തുന്ന കേന്ദ്രങ്ങളില്‍ നടക്കുന്നതും ഇത്തരം കാര്യങ്ങള്‍ തന്നെ. ചില പ്രത്യേക ദിക്‌റുകള്‍ ഇടതടവില്ലാതെ ഉരുവിടുവിക്കുകയും അത്യുച്ചത്തില്‍ ചെവികളില്‍ ഇത്തരം പ്രാര്‍ഥന കീര്‍ത്തനങ്ങള്‍ അടിച്ചേല്പിക്കുകയും ചെയ്യുമ്പോള്‍ അനുഭവപ്പെടുന്ന ഒരു പ്രത്യേക തരം അവസ്ഥ രോഗചികിത്സയായും ആത്മശാന്തിയായും പരിചയപ്പെടുത്തുകയാണ് ചെയ്യുന്നത്. ജിന്നും ചെകുത്താനുമെല്ലാം ബാധിച്ചവരെയാണ് ഇത്തരം കേന്ദ്രങ്ങള്‍ മുഖ്യമായും ചികിത്സിക്കുന്നത്. അടിച്ചും തൊഴിച്ചുമെല്ലാം ബാധയിറക്കുന്ന പരിപാടികളും ഇത്തരം കേന്ദ്രങ്ങളിലുണ്ട്. ക്വുര്‍ആന്‍ വാക്യങ്ങളും നബിവചനങ്ങളും തെറ്റായി വ്യാഖ്യാനിച്ചാണ് ഇതിന് രേഖയുണ്ടാക്കുന്നത്.

ജീവന്‍ ടി വി യില്‍ ആഴ്ചയിലൊരിക്കല്‍ പ്രത്യക്ഷപ്പെടുന്ന മുസ്‌ല്യാരും ചികിത്സാ തട്ടിപ്പു തന്നെയാണ് നടത്തുന്നത്. ലോകത്തുള്ള മുഴുവന്‍ രോഗങ്ങള്‍ക്കും ഇദ്ദേഹം ചികിത്സ പ്രഖ്യാപിക്കുന്നു. എല്ലാം ഏതെങ്കിലും ചില ക്വുര്‍ആന്‍ വാക്യങ്ങള്‍ ആവര്‍ത്തിച്ച് ഉരുവിടാനും ശരീരത്തില്‍ തടവാനും എഴുതി കുടിക്കാനുമെല്ലാമുള്ള നിര്‍ദ്ദേശങ്ങള്‍. ചൊറിയും ചിരങ്ങും മുടികൊഴിച്ചിലും മാരകമായ കാന്‍സര്‍ വരെ എല്ലാ രോഗങ്ങള്‍ക്കും ഇവിടെ ചികിത്സയുണ്ട്. ആത്മീയ ചൂഷണത്തിനുപുറമെ ഭീമമായ സാമ്പത്തിക തട്ടിപ്പും ഒരുമിച്ചാണ് ഇവിടെ നടക്കുന്നത്. ഇദ്ദേഹത്തിന്റെ പ്രാര്‍ഥന ചികിത്സാ പുസ്തകം നല്ല വിലക്ക് വിറ്റുകൊണ്ടും ഇദ്ദേഹം ചികിത്സാ ബിസിനസ്സ് ലാഭകരമാക്കുന്നു.


(ശബാബ് വാരിക 2016 ഏപ്രിൽ 22)

Tuesday, May 10, 2016

മൌദൂദി ഞങ്ങളുടെ ചങ്കായിരുന്നു ബ്രോ! അതൊക്കെ പണ്ടായിരുന്നു ബ്രോ!!

മൌദൂദി ഞങ്ങളുടെ ചങ്കായിരുന്നു ബ്രോ!
 അതൊക്കെ പണ്ടായിരുന്നു ബ്രോ!!

അബൂഹിമ
<<<<<<<<<>>>>>>>>
സുരേന്ദ്രൻ കരിപ്പുഴ(വേങ്ങര), ഭാഗവാതാചാര്യ പ്രഭാഷക പ്രേമ ജി പിഷാരടി (കളമശ്ശേരി), 
ശശി പന്തളം (ചിറയിൻ കീഴ്), കെ ജി മോഹൻ (ഗുരുവായൂർ),എം ജോസഫ് ജോൺ (അഴീക്കോട്), പി സി ഭാസ്കരൻ (കുറ്റ്യാടി), അജിത കൊല്ലാങ്കോട് (നെൻമാറ), ശശീന്ദ്രൻ ബപ്പങ്ങാട് (ബാലുശേരി), തോമസ് കെ ജോർജ്ജ് (പെരുംബാവൂർ), ജോഷി ജോസഫ് (കോന്നി), രാജു പുന്നക്കൽ (തിരുവമ്പാടി), ഗണേഷ് വടേരി (തിരൂർ), മോഹൻ ചാക്കോ (അരൂർ), ജ്യോതിവാസ് പരവൂർ (വൈപ്പിൻ), കൃഷ്ണൻ കുനിയിൽ (വണ്ടൂർ), പള്ളിപ്രം പ്രസന്നൻ(പേരാവൂർ), ജോസഫ് അമ്പലവയൽ (കൽ‌പ്പറ്റ) തുടങ്ങിയവരുടെ കരങ്ങൾക്ക് കരുത്തുപകർന്ന് ദൈവപ്രോക്തമായ ഇസ്‌ലാമിക വ്യവസ്ഥിതി സ്ഥാപിക്കാൻ ഗ്യാസ് സിലിണ്ടറും തലയിലേന്തി ജിഹാദ് നടത്തുന്ന ജമാ‌അത്ത് ഹാസ്യനാടകം കാണുമ്പോൾ അവരുടെ തന്നെ പഴയ ചില വലിയ വർത്തമാനങ്ങൾ ഓർക്കുക. 

ചിരി ആരോഗ്യത്തിന് നല്ലതാണെന്ന് പണ്ടാരോ പറഞ്ഞിട്ടുണ്ടല്ലോ.... 


ഗ്യാസായിപ്പോയ നിഷ്ഠ!!

''ജമാഅത്തെ ഇസ്‌ലാമി ഏതെങ്കിലും തെരഞ്ഞെടുപ്പില്‍ പങ്കെടുക്കുകയോ സ്ഥാനാര്‍ഥികളെ നിര്‍ത്തുകയോ പിന്താങ്ങുകയോ ചെയ്ത ഒരൊറ്റസംഭവമില്ലെന്നതിന് അതിന്റെ മുഴുവന്‍ ചരിത്രവും സാക്ഷിയാണ്. അത് തെരഞ്ഞെടുപ്പ് ബഹളങ്ങളില്‍ നിന്ന് പൂര്‍ണമായി വേറിട്ടു നില്ക്കുകയാണ് ചെയ്തിട്ടുള്ളത്. അപ്പോള്‍ പിന്നെ, അസാന്മാര്‍ഗികവും അകാരണവുമായ ഈ വേവലാതികളെല്ലാം എന്തിന്? തെരഞ്ഞെടുപ്പില്‍ നിന്നും രാഷ്ട്രീയ കോലാഹലങ്ങളില്‍ നിന്നും അകന്നുനില്ക്കുന്നതാണ് ജമാഅത്തിന്റെ നയമെന്ന് എല്ലാവര്‍ക്കുമറിയാം. ജമാഅത്തിന്റെ ഓരോ മെമ്പറും ഈ നയത്തില്‍ നിഷ്ഠയുള്ളവരാണ്.''
(പ്രബോധനം, 1972 ജൂലായ്)                                       
                                                                                 

ഗ്യാസായിപ്പോയ ഹറാം

''...അതിനാല്‍ ഞങ്ങള്‍ പറയുന്നു. ജനാധിപത്യത്തിലധിഷ്ഠിതമായ ഏതെല്ലാം പാര്‍ലമെന്റുകളും അസംബ്ലിയും ഇന്ന് നിലവിലുണ്ടോ അവയില്‍ അംഗമാവുന്നത് ഹറാമാണ്. അവര്‍ക്ക് വോട്ടു ചെയ്യലും ഹറാമാണ്. എന്തുകൊണ്ടെന്നാല്‍ വോട്ടു ചെയ്യുകയെന്നതിന്റെ അര്‍ഥം തന്നെ, തൗഹീദിന്റെ പരിപൂര്‍ണ നിഷേധമായ നിയമനിര്‍മാണം നിലവിലുള്ള ഭരണഘടനക്കനുസൃതമായി നിര്‍വഹിക്കാന്‍ ഒരാളെ നാം തന്നെ തെരഞ്ഞെടുക്കുക എന്നതാണ്.''
(മൗദൂദി, 'റസാഇല്‍ വ മസാഇല്‍' ഭാഗം:1, പേജ്:351-353)

                                         

ഗ്യാസായിപ്പോയ നേർ‌വഴി

''നമ്മുടെ അഭിപ്രായത്തില്‍ ഇന്നു മുസ്‌ലിംകള്‍ ചെയ്യേണ്ട ശരിയായ പ്രവൃത്തി-തെരഞ്ഞെടുപ്പില്‍നിന്ന് അവര്‍ തികച്ചും വിട്ടുനില്ക്കുകയെന്ന നിഷേധാത്മകതയില്‍ നിന്നാണാരംഭിക്കുന്നത്. അവര്‍ സ്വയം സ്ഥാനാര്‍ഥികളായി നില്ക്കുകയോ ഇതര സ്ഥാനാര്‍ഥികള്‍ക്ക് വോട്ടുനല്കുകയോ അരുത്. യഥാര്‍ഥ വഴിയില്‍ കൂടി ചലിക്കാനുള്ള ഒന്നാമത്തെ കാലടിയാണത്.''
(പ്രബോധനം, പു:4, ല: 2, 1956 ജൂലായ്, പേജ്:35)

                                             

ഗ്യാസായിപ്പോയ അടിസ്ഥാന വാക്യം

''....അതിനുപുറമെ, നിയമനിര്‍മാണ സഭയെ കുറിച്ചു ചിന്തിക്കേണ്ടതുണ്ട്. 'ലാഇലാഹ ഇല്ലല്ലാഹ് മുഹമ്മദുര്‍റസൂലുല്ലാഹ്' എന്ന അടിസ്ഥാന വാക്യത്തില്‍ വിശ്വസിക്കുന്ന ഒരു മുസ്‌ലിം നിയമനിര്‍മാണാധികാരം അല്ലാഹുവിന്റെ മാത്രം അവകാശമാണെന്നും മനസ്സിലാക്കേണ്ടിയിരിക്കുന്നു. എന്നിരിക്കെ, മനുഷ്യന് സ്വതന്ത്രമായി നിയമനിര്‍മാണാധികാരം നല്കുകയും കിതാബിനെയും സുന്നത്തിനെയും പാടെ അവഗണിച്ചുകൊണ്ട് അവകാശം ഉപയോഗപ്പെടുത്തുകയും അത്രയുമല്ല, അല്ലാഹുവിനെ പരസ്യമായി പരിഹസിക്കുക കൂടി ചെയ്യുന്ന ഒരു നിയമനിര്‍മാണ സഭയില്‍ മെമ്പറാകുകയോ അതിലേക്കുള്ള സ്ഥാനാര്‍ഥികളെ സഹായിക്കുകയോ ചെയ്യാന്‍ ഒരു മുസ്‌ലിമിന് നിവൃത്തിയില്ല.''
(പ്രബോധനം, പു:4, ലക്കം:3, അബുല്ലൈസ് സാഹിബിന്റെ ലേഖനം)

                                       

നിവൃത്തികേടിൽ നിന്ന് നിവൃത്തിയിലേക്ക്


''ഇന്നത്തെ മതേതരഭൗതിക രാഷ്ട്രീയത്തില്‍ സ്ഥാനാര്‍ഥിയായി നില്ക്കുവാനോ, മറ്റുവല്ല സ്ഥാനാര്‍ഥികളുടെയും വിജയത്തിന്നായി പ്രവര്‍ത്തിക്കാനോ വോട്ടു ചെയ്യാനോ മുസ്‌ലിമിന് നിവൃത്തിയില്ല.''
(ഇസ്‌ലാമിക പാഠങ്ങള്‍, അബൂസലീം അബുല്‍ഹയ്യ്-1955)

                                         

തിരിച്ചുകിട്ടിയ സുഖസുഷുപ്തി

''നിങ്ങളുടെ ആദര്‍ശം സത്യമാണെങ്കില്‍ മറ്റൊരു ദീനില്‍ (സ്റ്റെയ്റ്റ്) നിന്നുകൊണ്ട് നിങ്ങള്‍ക്ക് സുഖനിദ്രപോലും വരികയില്ല. എന്നിട്ടല്ലേ, നിങ്ങള്‍ ഇതരദീനുകള്‍ക്ക് (സ്റ്റെയ്റ്റ്) സേവനം ചെയ്യുകയും ആ സേവനത്തില്‍ ലഭ്യമാവുന്ന ആഹാരം സന്തോഷത്തോടെ ഭക്ഷിക്കുകയും സസുഖം കാല്‍നീട്ടി ഉറങ്ങുകയും ചെയ്യുക''
(ഖുതുബാത്ത്, പേജ്: 415)

                                           

ഗ്യാസായിപ്പോയ വൈരുദ്ധ്യങ്ങൾ

''ചുരുക്കത്തില്‍ താത്വികമായും കര്‍മപരമായും ദീനും സെക്കുലറിസവും (മതേതരത്വം) പരസ്പരം വിരുദ്ധമാണ്. നേര്‍ക്കുനേരെയുള്ള മാര്‍ഗം- അവ രണ്ടില്‍ ഏതെങ്കിലും ഒന്നിനോട് മാത്രം പൂര്‍ണബന്ധം സ്ഥാപിച്ച് മറ്റേതിനെ സന്തോഷത്തോടെ യാത്രയാക്കുകയാണ്. ഒരേസമയത്ത് രണ്ടു ദൈവങ്ങളെ അനുസരിക്കുക സാധ്യമല്ല തന്നെ. ''
(പ്രബോധനം, പുസ്തകം:5, ലക്കം:4)

                                           

ഗ്യാസായിപ്പോയ അസം‌തൃപ്തി

''ദൈവിക പരമാധികാരം നിരാകരിക്കുന്ന നിലവിലുള്ള അനിസ്‌ലാമിക വ്യവസ്ഥിതിയില്‍ ജമാഅത്തെ ഇസ്‌ലാമി പൂര്‍ണമായും അസംതൃപ്തരാണ്. അത് അടിമുടി മാറണമെന്ന് അതാഗ്രഹിക്കുന്നു. പകരം ദൈവപ്രോക്തമായ ഇസ്‌ലാമിക വ്യവസ്ഥിതി സ്ഥാപിക്കണമെന്നും.''
(പ്രബോധനം 1981, മെയ് 6)

                                                  

ഗ്യാസായിപ്പോയ തൌഹീദ്

''നിയമനിര്‍മാണത്തിന്നുള്ള അധികാരം ഒരു വ്യക്തിക്കുണ്ടെന്ന് സങ്കല്പിച്ച് അവനെ അനുസരിക്കല്‍ ശിര്‍ക്കാണ്.''
(പ്രബോധനം 1972, ജൂലായ്)

                                             

വിശുദ്ധമായി മാറിയ വിരുദ്ധം

''അനിസ്‌ലാമിക ഭരണവ്യവസ്ഥയുടെ നടത്തിപ്പില്‍ ഭാഗഭാക്കാവുന്നത് മുസ്‌ലിംകളെ സംബന്ധിച്ചിടത്തോളം വിരുദ്ധമാണെന്ന് ജമാഅത്തെ ഇസ്‌ലാമി വിശ്വസിക്കുന്നു.''
(പ്രബോധനം, 1970 ജൂലായ്)

                                                 

മറന്നു പോയ ഒന്നാം തിയതി

''രാജ്യത്തെ നിലവിലുള്ള നീതിന്യായ വ്യവസ്ഥ മനുഷ്യനിര്‍മിത നിയമങ്ങളില്‍ സ്ഥാപിതമായിരിക്കുന്നു; അതിനുകീഴില്‍ നടക്കുന്ന സ്ഥാപനങ്ങളെക്കുറിച്ച് പറയപ്പെട്ടിരുന്നു, അവയും നിഷിദ്ധ വ്യവസ്ഥയുടെ ഉപകരണങ്ങളാണെന്ന്. അതിനാല്‍ ജമാഅത്തിന്റെ ഒന്നാം തിയ്യതിമുതലുള്ള നയം ഇതായിരുന്നു. ഈ വ്യവസ്ഥയുമായി സഹകരിക്കല്‍ തെറ്റാണ്. അതിന്റെ നീതിന്യായ വ്യവസ്ഥകളോട് സഹായമര്‍ഥിക്കല്‍ ത്വാഗൂത്തിനോട് സഹായമര്‍ഥിക്കലാണ്.''
(ജമാഅത്തെ ഇസ്‌ലാമി 27 വര്‍ഷം, പേജ്: 55)


                                                

ഇപ്പോ തോന്നിയല്ലോ!!

''ഇന്നാട്ടിലെ ഭരണം ഇസ്‌ലാമികമായിരിക്കുമെന്ന് ഗവണ്‍മെന്റ് പ്രഖ്യാപിക്കുകയോ അഥവാ തെരഞ്ഞെടുപ്പില്‍ പങ്കെടുക്കുക വഴി ഭരണം ഇസ്‌ലാമികമാക്കി മാറ്റാന്‍ സാധിക്കുമെന്ന് ജമാഅത്തിന് തോന്നുകയോ ചെയ്യാത്ത കാലത്തോളം ഞങ്ങള്‍ തെരഞ്ഞെടുപ്പില്‍ പങ്കെടുക്കുകയില്ല.''
(പ്രബോധനം 1952 ജനുവരി 1, പുസ്തകം:4, ലക്കം:8, പേജ്:163)

                                                  

അത് അന്ന്, ഇന്ന് വാജിബ്

''ഒരാള്‍ തെരഞ്ഞെടുപ്പില്‍ മത്സരിക്കുകയും അസംബ്ലിയില്‍ പോവുകയും ചെയ്യുന്നത് തൗഹീദിന് എതിരാവുന്നു.''
(ഇന്ത്യന്‍ ജമാഅത്തെ ഇസ്‌ലാമി 27 വര്‍ഷം)

                                                  

വോട്ട്-സിദ്ധാന്തങ്ങള്‍ക്ക്

''പ്രത്യക്ഷത്തില്‍ ചില വ്യക്തികളാണെങ്കിലും യഥാര്‍ഥത്തില്‍ ചില സിദ്ധാന്തങ്ങളും പ്രസ്ഥാനങ്ങളുമാണിന്ന് തെരഞ്ഞെടുപ്പില്‍ മത്സരിക്കുന്നത്. ആ വ്യക്തികള്‍ക്കുള്ള വോട്ട് അവര്‍ പ്രതിനിധാനം ചെയ്യുന്ന സിദ്ധാന്തങ്ങള്‍ക്ക് ബൈഅത്ത് ചെയ്യലാണ്. അതിനാല്‍ ഒരു യഥാര്‍ഥ മുസല്‍മാന് അതിന് സാധ്യമല്ല.''
(പ്രബോധനം, 1960 ജനുവരി 2)

                                               

മനാത്തക്ക് ജമാ‌അത്ത് അംഗീകാരം!!

“സാമ്രാജ്യത്തമാകുന്ന ദൈവത്തെ നീക്കം ചെയ്ത് പ്രജായത്തമാകുന്ന ദൈവത്തെ ഗവൺ‌മെന്റാകുന്ന വിഗ്രഹാലയത്തിൽ പ്രതിഷ്ഠിക്കുന്നത് കൊണ്ട് ഒരു മുസ്ലിമിന്റെയടുക്കൽ യഥാർത്ഥത്തിൽ ഒരു മാറ്റവും സംഭവിക്കുന്നില്ല. ലാത്ത പോയി മനാത്ത വന്നുവെന്ന് മാത്രം. ഒരു വ്യാജദൈവത്തിന്റെ സ്ഥാനം മറ്റൊരു വ്യാജ ദൈവം കൈക്കലാക്കി.“
(പ്രബോധനം, 1950 മെയ് 15)


ഇസ്‌ലാം ജലരേഖയാവട്ടെ, 
നമുക്കും വേണം അധികാരം

“മുസൽമാനെ സംബന്ധിച്ചിടത്തോളം ഞാനിതാ അവരോട് തുറന്ന് പ്രസ്താവിക്കുന്നു: ആധുനിക മതേതര ദേശീയ ജനാധിപത്യം നിങ്ങളുടെ ഇസ്ലാമിനും ഈമാനിനും കടകവിരുദ്ധമാണ്...അതിന്റെ മൌലിക തത്വങ്ങളും ഇതിന്റെ മൌലിക തത്വങ്ങളും തമ്മിൽ പ്രത്യക്ഷ സംഘട്ടനമാണ്. അതിന്റെ ഓരോ ഘടകവും ഇതിന്റെ ഓരോ ഘടകവുമായി സന്ധിയില്ലാത്ത യുദ്ധമാണ്. പ്രസ്തുത വ്യവസ്ഥിതിയുമായി ഇസ്ലാം യോജിക്കുന്ന ഒരു പോയിന്റുമില്ല. ആ വ്യവസ്ഥിതിയിൽ അധികാരം വാഴുന്നിടത്ത് ഇസ്‌ലാം വെറും ജലരേഖയായിരിക്കും” (മൌദൂദി: മതേതരത്വം, ദേശീയത, ജനാ‍ാധിപത്യം ഒരു താത്വിക വിശകലനം.)


ഒരേ സമയത്ത് രണ്ട് ദൈവങ്ങൾ!!

“ചുരുക്കത്തിൽ താത്വികമായും കർമ്മപരമായും ദീനും സെക്യുലറിസവും പരസ്പര വിരുദ്ധമാണ്. നേറ്ക്കുനേരെയുള്ളത് അവരണ്ടിൽ ഏതെങ്കിലും ഒന്നിനോട് മാത്രം പൂർണ്ണബന്ധം സ്ഥാപിച്ച് മറ്റേതിനെ സന്തോഷത്തോടെ യാത്രയാക്കുക എന്നതാണ്. ഒരേ സമയത്ത് രണ്ട് ദൈവങ്ങളെ അനുസരിക്കുക സാധ്യമല്ല തന്നെ.”
(പ്രബോധനം, പു. 5, ല: 5)

വല്ലാത്തൊരു തത്വം!!

“നിയമ നിർമ്മാണാധികാരം അല്ലാഹുവല്ലാത്തവർക്ക് വകവെച്ച് കൊടുത്ത് അവരുടെ നിയമങ്ങളെ നിരുപാധികം അനുസരിക്കുന്നത് തീർച്ചയായും ശിർക്ക് തന്നെ. പക്ഷെ നിയമനിർമ്മാണത്തിനുള്ള പരമാധികാരം അല്ലാഹുവിനു മാത്രമാണെന്നും അല്ലാഹുവിന്റെ കൽ‌പ്പനക്കെതിരായി ആരെയും നിരുപാധികം അനുസരിക്കുന്നത് ശിർക്കാണെന്നും വിശ്വസിക്കുന്ന ജമാ‌അത്തെ ഇസ്‌ലാമിയെ സംബന്ധിച്ചിടത്തോളം ഇവിടെ ശിർക്ക് ചെയ്യുന്ന പ്രശ്നമേ ഉൽഭവിച്ചിട്ടില്ല. അല്ല്ലാഹുവിന്റെ കൽ‌പ്പനകൾക്കെതിരായി അവനല്ലാത്തവർ നിർമ്മിച്ച ചില നിയമങ്ങൾക്ക് വിധേയമായി ജമാ‌അത്തെ ഇസ്ലാമിക്കാർ ഇവിടെ ജീവിക്കുന്നുണ്ടെങ്കിൽ അത് നിയമനിർമ്മാണത്തിനുള്ള അധികാരം ദൈവേതര ശക്തികൾക്ക് വകവെച്ച് കൊടുത്തുകൊണ്ടല്ല. നാട്ടിൽ അരാജകത്വമോ കുഴപ്പമോ സൃഷ്ടിക്കാതെ സമാധാനപരമായ ആദർശപരിവർത്തനത്തിന് ശ്രമിക്കുകയെന്ന തത്വപ്രകാരം മാത്രമാണ്”
(പ്രബോധനം, 1971 സെപ്ത: 11)


മറന്നുപോയ നയം

“തെരഞ്ഞെടുപ്പിൽ രാഷ്ട്രീയ കോലാഹലങ്ങളിൽ നിന്നും അകന്ന് നിൽക്കുകയെന്നതാണ് ജമാ‌അത്തെ ഇസ്‌ലാമിയുടെ നയമെന്ന് എല്ലാവർക്കും വ്യക്തമായി അറിയാം. ജമാ‌അത്തിന്റെ ഓരോ മെമ്പറും ജമാ‌അത്തിന്റെ ഈ നയത്തിൽ നിഷ്ഠയുൾലവരാണ്”
(ഇന്ത്യൻ ജമാ‌അത്തെ ഇസ്‌ലാമി എന്ത്, എന്തല്ല? , പേജ്: 21,22)

അലിഞ്ഞ് പോയ ഉറപ്പ്!!

“അനിസ്‌ലാമിക ഭരണവ്യവസ്ഥയുടെ മടത്തിപ്പിൽ ഭാഗഭാക്കാവുകയെന്നത് മുസ്‌ലിംകളെ സംബന്ധിച്ചിടത്തോളം നിഷിദ്ധമാണെന്ന്  ജമാ‌അത്തെ ഇസ്‌ലാമി ഉറച്ച് വിശ്വസിക്കുന്നു. അതിനാൽ ഏതെങ്കിലും അനിസ്‌ലാമിക പ്രസ്ഥാനവുമായി കൂട്ടുചേർന്ന് ഭരണ നടത്തിപ്പിൽ പങ്കുകാരാവുകയോ അത്തരം പ്രസ്ഥാനങ്ങൾക്ക് വോട്ട് നൽകുകയോ ചെയ്യുന്നത് ജമാ‌അത്തിന്റെ വീക്ഷണത്തിൽ അനുവദനീയമല്ല”
(പ്രബോധനം, 1970 ജൂലായ്)

അന്ന് കയ്യൊഴിഞ്ഞുഇന്ന് കയ്യടക്കുന്നു!!

“ദൈവികമല്ലാത്ത ഏതെങ്കിലും ഭരണവ്യവസ്ഥയിൽ താൻ വല്ല കുഞ്ചിക സ്ഥാനവും വഹിക്കുന്നവനോ അതിന്റെ നിയമനിർമ്മാണ സഭയിലെ അംഗമോ അതിന്റെ കോടതി വ്യവസ്ഥയിൻ കീഴിൽ ന്യായാധിപ സ്ഥാനത്ത് നിയമിക്കപ്പെട്ടവനോ ആണെങ്കിൽ ആ സ്ഥാനം കയ്യൊഴിക്കുക” 
(ഇന്ത്യൻ ജമാ‌അത്തെ ഇസ്‌ലാമി ഭരണ ഘടന, പേജ്: 34, 1979)

ഇന്ന് ഹലാലായ അഹോവൃത്തിമാർഗ്ഗം

 “ദൈവികമല്ലാത്ത ഏതെങ്കിലും ഭരണ വ്യവസ്ഥിതിയുടെ ഉപകരണമോ അതിന്റെ നിയമങ്ങളുടെ നടത്തിപ്പിൽ സഹായിയോ ആണെങ്കിൽ ആ അഹോവൃത്തി മാർഗ്ഗത്തിൽ നിന്ന് കഴിയും വേഗം ഒഴിവാകുക”
(ഇന്ത്യൻ ജമാ‌അത്തെ ഇസ്‌ലാമി ഭരണ ഘടന, പേജ്: 16, 1979)


ജാഹിലിയ്യത്തിനൊരു മത്സരം 

'' നമ്മുടെ നാട് അംഗീകരിച്ച രാഷ്ട്രീയ വ്യവസ്ഥയില്‍ നിയമനിര്‍മാണത്തിന്റെ പരമാധികാരം ജനങ്ങള്‍ക്കാണ്. അഥവാ തെരഞ്ഞെടുക്കപ്പെടുന്ന ജനപ്രതിനിധികള്‍ക്കാണ്. അതിനാലിവിടെ നിലനില്ക്കുന്ന വ്യവസ്ഥ അനിസ്‌ലാമികമാണ്. അഥവാ ജാഹിലിയ്യത്താണ് '' (പ്രബോധനം 2006 മെയ് 20, പേജ് 29) 

ഇങ്ങിനെ നിർബന്ധിച്ചാ പിന്നെന്താ ചെയ്യാ?

 '' ഇന്ത്യന്‍ ജമാഅത്തെ ഇസ്‌ലാമിയുടെ ഒരംഗവും ഒരു എം പിയോ, എം എല്‍ എയോ എന്നുവേണ്ട പഞ്ചായത്ത്‌ മെമ്പര്‍ പോലും ആയിട്ടില്ല; ആകാന്‍ ശ്രമിച്ചിട്ടുമില്ല. രാഷ്‌ട്രീയ ലക്ഷ്യമായിരുന്നുവെങ്കില്‍ ഇഖാമത്തുദ്ദീനിന്‌ ശ്രമിക്കുന്നതിനു പകരം നിലവിലുള്ള ഏതെങ്കിലുമൊരു പാര്‍ട്ടിയുടെ മുദ്രാവാക്യമംഗീകരിച്ച്‌ അവരോടൊപ്പം ചേരുകയാണ്‌ വേണ്ടിയിരുന്നത്‌. എന്നാല്‍ നിലവിലുള്ള ഭരണവ്യവസ്ഥിതി നടത്തിക്കൊണ്ടുപോകാന്‍ നിര്‍ബന്ധിച്ച്‌ ഏല്‌പിച്ചാല്‍ പോലും ജമാഅത്തതിന്‌ തയ്യാറാവുകയില്ല. അധികാരം നല്‍കാമെന്ന്‌പറഞ്ഞ ഖുറൈശീ പ്രമുഖരോട്‌ നബി(സ) പറഞ്ഞ മറുപടി ആവര്‍ത്തിച്ച്‌ പ്രഖ്യാപിക്കുകയും ചെയ്യും. കാരണം ജമാഅത്തെ ഇസ്‌ലാമി ആഗ്രഹിക്കുന്നത്‌ നിലവിലുള്ള വ്യവസ്ഥകള്‍ക്ക്‌ പകരം ഇസ്‌ലാമിന്റെ സംസ്ഥാപനമാണ്‌.''
 (ശൈഖ്‌ മുഹമ്മദ്‌ കാരക്കുന്ന്‌, തെറ്റിദ്ധരിക്കപ്പെട്ട ജമാഅത്തെ ഇസ്‌ലാമി, പേജ്‌ 44, 1998ലെ ഐ പി എച്ച്‌ എഡിഷന്‍) 

ഹേയ്..അതൊക്കെ വെറുതെ പറഞ്ഞതല്ലേ!!

 ''ഇസ്‌ലാമിക വിരുദ്ധമായ ഒരു ഭരണവ്യവസ്ഥക്കു കീഴില്‍ ഉദ്യോഗങ്ങള്‍ക്കും സീറ്റുകള്‍ക്കും വേണ്ടി മുറവിളി കൂട്ടുക എന്നതാകട്ടെ മുസ്‌ലിംകളെ സംബന്ധിച്ചേടത്തോളം ചിന്തിക്കാന്‍ പോലും കഴിയാത്ത അത്രമാത്രം നീചമൊയൊരവസ്ഥയാണ് ''
 (പ്രബോധനം 1953 ഡിസംബര്‍ 15)

തലച്ചോറിലെ പ്ലാനുമായി സങ്കൽ‌പ്പ വീടന്വേഷിക്കുന്നവർ

 ''സ്വന്തം ഭരണമില്ലാത്ത ദീനിന്റെ സ്ഥിതി ഭൂമിയില്‍ സ്ഥാപിക്കപ്പെടാത്ത ഒരു സങ്കല്പ വീടുപോലെയാണ്. ഭൂമിയില്‍ സ്ഥാപിതമായ ഒരു വീട്ടില്‍ മാത്രമേ നിങ്ങള്‍ക്ക് താമസിക്കാന്‍ സാധിക്കുകയുള്ളൂവെങ്കില്‍ പിന്നെ തലച്ചോറില്‍ മറ്റൊരു വീട്ടിന്റെ പ്ലാന്‍ ഉണ്ടായിരിക്കുന്നതുകൊണ്ട് എന്ത് പ്രയോജനമാണുള്ളത് (മൗദൂദി: ഖുത്തുബാത്ത്, പേജ് 381)

ജനാധിപത്യവും ഇസ്ലാമുമായി യാതൊരു ബന്ധവുമില്ല.

ഇസ്ലാമിക രാഷ്ട്ര വ്യവസ്ഥയെ കുറിച്ച് ജനാധിപത്യം എന്ന പ്രയോഗം തന്നെ ശരിയല്ല.
ഹുകൂമത്തെ ഇലാഹി അഥവാ മതാധിപത്യം എന്ന പദമാണ് ഇസ്ലാമിക വ്യവസ്ഥക്ക് ഏറവും യോജിച്ചത് .
 ( ഇസ്ലാമിന്റെ രാഷ്ട്രീയ സിദ്ധാന്തം : പേജ് :23;24)

രണ്ടും "ശിർക്ക് " തന്നെ

പ്രജാധിപത്യമായാലും ഏകാധിപത്യമായാലും ഫലത്തിൽ വ്യത്യാസമില്ല.രണ്ടും സൃഷ്ടികളുടെ ആധിപത്യം തന്നെ. തമ്പുരാക്കളുടെ എണ്ണത്തിൽ മാത്രമാണ് വ്യത്യാസം.
പ്രജാധിപത്യത്തിൽ ഒന്നിലധികം തമ്പുരാക്കൾ ദിവ്യത്വം വാഴുകയും നിയമ വ്യവസ്ഥകൾ അവതരിപ്പിക്കുകയും ചെയുന്നു .എകാധിപത്യത്തിലാവട്ടെ ഒരു ദൈവം തന്റെ മന്ത്രിമാരുടെയും ഉപദേഷ്ടാക്കളുടെയും സഹായത്തോടെ ദിവ്യത്വം നടത്തുന്നു .രണ്ടും "ശിർക്ക് " തന്നെ.
 ( ശിർക്ക് അഥവാ ബഹുദൈവത്വം : അമീൻ അഹ്സൻ ഇസ്ലാഹി )












Tuesday, February 23, 2016

ഹുസൈൻ മടവൂർ തൌഹീദ് പറഞ്ഞില്ലെന്നോ?

ഹുസൈൻ മടവൂർ തൌഹീദ് പറഞ്ഞില്ലെന്നോ?

                                               അബൂഹിമ

              കേരള മുസ്ലിംകൾക്കിടയിൽ പ്രമാണബദ്ധമായ ആദർശ പ്രബോധനവുമായി ശ്രദ്ധേയമായ നവോത്ഥാന മുന്നേറ്റം നടത്തിക്കൊണ്ടിരുന്ന മുജാഹിദ് പ്രസ്ഥാനത്തിൽ അപസ്വരമുണ്ടാക്കി കൊണ്ട് ഒരു പറ്റം ക്ഷുദ്രശക്തികൾ രംഗപ്രവേശം ചെയ്തത് 1999ലാണ്.  ഇസ്ലാഹി പ്രസ്ഥാനം മുന്നോട്ട് വെച്ച സത്യാദർശം പ്രബോധിത സമൂഹത്തിൽ സ്വീകാര്യത നേടിക്കൊണ്ടിരിക്കുന്ന നിർണ്ണായക വേളയിൽ തന്നെ പ്രസ്ഥാനത്തിന്റെ വിശ്വാസ്യതക്കും സ്വീകാര്യതക്കും കളങ്കമേൽ‌പ്പിച്ച് കൊണ്ട് ഇവർ താണ്ഡവമാടുകയായിരുന്നു. പ്രസ്ഥാന ചരിത്രത്തിലെ കറുത്ത യുഗത്തിന്റെ നാന്ദിയായിരുന്നു അത്. ആദർശ സ്നേഹികളുടെയും ഗുണകാംക്ഷികളുടെയും മനസ്സിൽ അഗാധമായ മുറിപ്പാടുകൾ തീർത്ത് 2002 ആഗസ്റ്റിൽ പ്രസ്ഥാനത്തിൽ ദൌർഭാഗ്യകരമായ പിളർപ്പ് സംഭവിച്ചു. പതിറ്റാണ്ടുകൾ മതാധ്യാപനങ്ങളുടെ മഹിത സന്ദേശങ്ങളുടെ പ്രചാരണ കേന്ദ്രമായി വർത്തിച്ച കോഴിക്കോട് ആനീഹാൾ റോഡിലെ മുജാഹിദ് സെന്ററിൽ നിന്ന് വമിച്ച വ്യക്തിവിദ്വേഷത്തിന്റെയും കുതന്ത്രങ്ങളുടെയും ദുർഗന്ധം പ്രസ്ഥാനത്തിന്റെ പ്രതിച്ഛായയെ വികൃതമാക്കി. നേരും നെറിയും മറന്ന ആരോപണ ഗവേഷണങ്ങളായിരുന്നു കുറേ കാലം അവിടെ നടന്ന പ്രധാന പരിപാടി. 

             ബഹുമാന്യനായ ഹുസൈൻ മടവൂരിനെയും അദ്ദേഹത്തിന്റെ കരുത്തുറ്റ നേതൃത്വത്തിൽ ഉജ്ജ്വലമായ ഉത്ഥാനത്തിന്റെ തെളിച്ചം സമൂഹത്തിൽ അടയാളപ്പെടുത്തിയ ഐ എസ് എമ്മുമായിരുന്നു ആരോപകരുടെ പ്രധാന ഉന്നം. അവർ പലതും ആരോപിച്ചു. ഒന്നു പോലും സത്യവുമായി ഒരു ബന്ധവുമുണ്ടായിരുന്നില്ല. ആദർശം നെഞ്ചേറ്റിയ നിഷ്കളങ്കരായ സാധാരണ  മുജാഹിദ് പ്രവർത്തകരെ കയ്യിലെടുക്കാൻ ചില നെറികെട്ട പൊടിക്കൈകളും അവർ പ്രയോഗിച്ചു. 

               അതിലൊന്നായിരുന്നു, ഹുസൈൻ മടവൂർ ആദർശം പറയാൻ, പ്രത്യേകിച്ച് തൌഹീദ് പ്രചരിപ്പിക്കാൻ വിമുഖത കാണിക്കുന്നു എന്ന്. തന്റെ നേതൃത്വത്തിലുള്ള ഐ എസ് എം അണികളെ ആദർശപരമായി ഷണ്ഡീകരിക്കാൻ ശ്രമിച്ചുവെന്നും അവർ പറഞ്ഞു പ്രചരിപ്പിച്ചു. ജമാ‌അത്ത് ആശയത്തോടും ആ പക്ഷത്തോടും മൃദുസമീപനം പുലർത്തുകയും ഇഖ്‌വാനിസത്തിലേക്ക് പ്രവർത്തരെ റിക്രൂട്ട് ചെയ്യുകയും ചെയ്യുന്ന ഏജന്റെന്ന് വരെ അവർ അദ്ദേഹത്തെ ആക്ഷേപിച്ചു. സംഘടനയോട് വളരെ അടുത്ത ബന്ധം പുലർത്താത്ത ചില മുജാഹിദുകളും ആരോപകപക്ഷത്തെ അതിയായി വിശ്വസിച്ച ഒരുപറ്റം പ്രവർത്തകരും ഇത്തരം തെറ്റിധരിപ്പിക്കലുകളുടെ ഇരകളായി എന്നത് സത്യം.  

               യഥാർത്ഥത്തിൽ, പ്രസ്ഥാന ചരിത്രത്തിലെ ഏറ്റവും ശ്രദ്ധേയമായ ആദർശ ജാഗരണവും പ്രബോധന മുന്നേറ്റവുമായിരുന്നു മടവൂരിന്റെ നേതൃത്തിൽ ഐ എസ് എം സാധ്യമാക്കിയത്. ആദർശ വിഷയങ്ങളിൽ വിട്ടുവീഴ്ചയില്ലാത്ത കാർക്കശ്യം പരിശീലിപ്പിക്കുകയും അതേ സമയം മനുഷ്യരുമായും രാജ്യവുമായും സംസ്കാരവുമായുമൊക്കെ ബന്ധപ്പെട്ട വിവിധ വിഷയങ്ങളിൽ കൃത്യമായ ഇടപെടലുകൾ നടത്താൻ ഐ എസ് എമ്മിനെ സജ്ജമാക്കി. പൊതുസമൂഹത്തിൽ നട്ടെല്ലുള്ളഒരു യുവജന പ്രസ്ഥാനമായി ഐ എസ് എം ജ്വലിച്ച് നിന്നു. 

               മത സംഘടനകൾക്ക് അന്യമെന്ന് ഗണിക്കപ്പെട്ടിരുന്ന പൊതുവിഷയങ്ങളിലേക്കും പ്രവർത്തകരുടെ ശ്രദ്ധ തിരിച്ചത് മതപരമായ ഒരു ദൌത്യനിർവഹണം കൂടിയായിരുന്നു എന്ന്, പിൽക്കാലത്ത് അവയൊക്കെ ഏറ്റെടുത്ത് കൊണ്ട് വിമർശകർ പോലും അംഗീകരിച്ചതിന് ചരിത്രം സാക്ഷി. ഐ എസ് എമ്മിന്റെ നിലപാടുകളും നിരീക്ഷണങ്ങളും സംഘടനയുടെ പുറം ലോകത്തുള്ളവരും ആവേശത്തോടെയും പ്രതീക്ഷയോടെയും ഉറ്റു നോക്കുന്ന അവസ്ഥയുണ്ടായതിനെയാണ് മേൽ‌സൂചിപ്പിക്കപ്പെട്ട ക്ഷുദ്രശക്തികൾ തെറ്റായി വ്യാഖ്യാനിച്ചത്. മതരംഗത്തെ സജീവ സാന്നിധ്യം മറച്ച് വെച്ച് പൊതുരംഗത്തെ ഇടപെടലുകളെ പെരുപ്പിച്ച് കാണിച്ച് തെറ്റിധരിപ്പിക്കുകയായിരുന്നു.

               ദുരാരോപണങ്ങളുന്നയിച്ച് ആദർശപ്രസ്ഥാനത്തിന്റെ മുഖം കെടുത്താൻ ശ്രമിച്ചവർക്ക് പിന്നീട് സ്വസ്ഥത ലഭിച്ചിട്ടില്ല. തൌഹീദും സുന്നത്തും പ്രസംഗകന്റെ നാവുകളിലും കാമ്പയിനുകളുടെയും സമ്മേളനങ്ങളുടെയും പ്രമേയങ്ങളിലും ആവർത്തിക്കപ്പെടുന്ന കേവല വാക്കുകളായി മാറി അവർക്ക്. തമ്മിൽതല്ലും ചേരിപ്പോരും അരങ്ങു തകർത്തു. ഹിഫ്സുറഹ്മാനും സുബൈർ മങ്കടയും ഷാർജ സലഫിയും സകരിയ സ്വലാഹിയും ഓരോ കഷ്ണങ്ങൾ അടർത്തിക്കൊണ്ടു പോയി. ആദർശത്തിന്റെ ആണിക്കല്ലുപോലും എന്തെന്നറിയാതെ പരസ്പരം പോരടിച്ച് നട്ടം തിരിയുകയാണ് 99ലെ ആ ആരോപക മുന്നണി.

               ബഹു. ഹുസൈൻ മടവൂർ ഐ എസ് എം പ്രസിഡന്റായിരുന്ന കാലത്ത് ശബാബിൽ അദ്ദേഹം കൈകാര്യം ചെയ്തിരുന്ന കോളത്തിൽ 1992 ഫെബ്രുവരി 7നു എഴുതിയ ലേഖനം പുതിയ സാഹചര്യത്തിൽ ഒരാവർത്തി വായിക്കുക. പ്രസിഡന്റെന്ന നിലയിൽ ഇസ്ലാഹി യുവതയോട് അദ്ദേഹം സംവദിച്ചിരുന്ന ശൈലി, പങ്കുവെച്ചിരുന്ന വിഷയങ്ങൾ, നിർദ്ദേശങ്ങൾ, പഠിപ്പിച്ചിരുന്ന സംസ്കാരം...തുടങ്ങിയവക്കെല്ലാം ഉദാഹരണമായി നിരവധി ഉദാഹരണങ്ങളിലൊന്ന് മാത്രം. ഇതു മാത്രം മതി, ശിഥില ശക്തികളുടെ കുതന്ത്രങ്ങളും ദുഷ്ടലാക്കും മനസ്സിലാക്കാൻ. 92ൽ പ്രസ്ഥാനത്തിൽ ഇത്തരത്തിലുള്ള ഒരു ആരോപണങ്ങളുമുയർന്നിരുന്നില്ല, ഒരു ബന്ധവും അടർന്നിരുന്നില്ല, പിശാചിന്റെ കുതന്ത്രങ്ങൾക്ക് വേരോട്ടം കിട്ടിയിരുന്നില്ല.... അതുകൊണ്ട് തന്നെ ഇത്ര പച്ചയായി ആദർശം പറയുന്നത്, ജമാ‌അത്ത്-സുന്നി വിഭാഗങ്ങൾക്കിടയിൽ പ്രവർത്തിക്കുന്ന മുജാഹിദ് യുവതക്ക് തൌഹീദിലധിഷ്ഠിതമായ കൃത്യമായ മാർഗ്ഗനിർദ്ദേശം നൽകുന്നത് ആരെയെങ്കിലുമൊക്കെ ബോധിപ്പിക്കാനായിരുന്നുവെന്നോ പുകമറയിടാനായിരുന്നുവെന്നോ ഏതായാലും വിവേകമുള്ളവർ പറയില്ലല്ലോ. 

ലേഖനം വായിക്കുക: 

                       പ്രശ്നം ശാഖാപരവും നിസ്സാരവുമല്ല


'ലാ ഇലാഹ ഇല്ലല്ലാഹു മുഹമ്മദുര്‍റസൂലുല്ലാഹ്' എന്ന ശഹാദത്ത് കലിമയുടെ പ്രഖ്യാപനവും പ്രചാരണവുമാണ് ഇസ്ലാഹീപ്രസ്ഥാനത്തിന്‍റെ പ്രവര്‍ത്തനങ്ങളില്‍ ഏറ്റവും പ്രധാനപ്പെട്ടത്. ആരാധനക്കര്‍ഹന്‍ അല്ലാഹു മാത്രമാണെന്നും മുഹമ്മദ്‌ നബി (സ) അല്ലാഹുവിന്‍റെ പ്രവാചകനുമാണെന്നുമുള്ള പ്രഖ്യാപനം മനസ്സിലും വാക്കിലും പ്രവര്‍ത്തനത്തിലുമുണ്ടാകണമെന്ന കാര്യത്തില്‍ മുസ്ലിംകള്‍ക്കിടയില്‍ അഭിപ്രായവ്യത്യാസമില്ല. ഒരു മുസ്ലിമിന്‍റെ ജീവിതത്തെ നിയന്ത്രിക്കാനുള്ള ശക്തികേന്ദ്രമാണ് സത്യസാക്ഷ്യം.

ഇതാണ് വസ്തുതയെങ്കിലും വിവിധ മതവിശ്വാസികളുമായി ഇഴുകിച്ചേര്‍ന്നുകഴിയുന്ന നമ്മുടെ നാട്ടിലെ മുസ്ലിംകളില്‍ പലരും വിശ്വാസങ്ങളിലും ആചാരങ്ങളിലും മറ്റു മതക്കാരെ അനുകരിച്ചുപോരുന്നു. അല്ലാഹുവില്‍ പങ്കുചേര്‍ക്കുക (ശിര്‍ക്ക്) ഗുരുതരമായ കുറ്റമാണെന്ന് എല്ലാ മുസ്ലിംകള്‍ക്കുമറിയാം. അല്ലാഹു അല്ലാത്തവരോട് ആരാധന (ഇബാദത്ത്) നടത്തിയാല്‍ ശിര്‍ക്കാണെന്നുമറിയാം. എന്നാല്‍ എന്താണ് ഇബാദത്ത്? എന്താണ് ശിര്‍ക്ക്? എന്ന് കൃത്യമായി പലര്‍ക്കും അറിഞ്ഞുകൂടാ. അതിനാല്‍ ഭക്തരും നിഷ്കളങ്കരുമായ എത്രയോ മുസ്ലിംകള്‍ അല്ലാഹു അല്ലാത്തവര്‍ക്ക് ഇബാദത്ത് ചെയ്തു ശിര്‍ക്കില്‍ അകപ്പെടുന്നു. അല്ലാഹുവേ രക്ഷിക്കണേ എന്ന് പ്രാര്‍ഥിക്കേണ്ട മുസ്ലിംകളില്‍ ധാരാളമാളുകള്‍ ഇന്ന് മണ്മറഞ്ഞ മഹാന്മാരോടാണ് പ്രാര്‍ഥിക്കുന്നത്. പ്രാര്‍ത്ഥന (ദുആ)യാണ് ഇബാദത്ത് (ആരാധന) എന്ന നബിവചനം ഇവര്‍ മനസ്സിലാക്കിയിട്ടില്ല.

ഖുര്‍ആനില്‍ ധാരാളം പ്രാര്‍ത്ഥനകളുണ്ട്. ആദം നബി (അ) മുതല്‍ മുഹമ്മദ്‌ നബി (സ) വരെയുള്ള അമ്പിയാക്കളില്‍ പലരുടെയും പ്രാര്‍ത്ഥനകള്‍ എല്ലാം അല്ലാഹുവിനോട് മാത്രം. ഈസാ നബി, മറിയം ബീവി, വദദ്, സുവാഅ' തുടങ്ങിയ മഹാന്മാരോട് പ്രാര്‍ഥിച്ച സമൂഹങ്ങളെ ഖുര്‍ആന്‍ ശക്തമായ ഭാഷയില്‍ താക്കീത് ചെയ്തിട്ടുണ്ട്. നമ്മുടെ നാട്ടില്‍ കാണുന്ന ജാറങ്ങളും ഉത്സവങ്ങളും മറ്റും ശിര്‍ക്കന്‍ പ്രവര്‍ത്തനങ്ങളുടെ വ്യക്തമായ രൂപമാണെന്ന കാര്യത്തില്‍ സംശയമില്ല.

നമുക്ക് ചുറ്റും ജീവിക്കുന്ന നമ്മുടെ സഹോദരന്മാര്‍, അയല്‍വാസികള്‍, കുടുംബക്കാര്‍, സ്നേഹിതന്മാര്‍ തുടങ്ങിയവരില്‍ പലരും അവരറിയാതെ ശിര്‍ക്കിന്‍റെ വഴിയിലേക്ക് നീങ്ങുന്നുണ്ട്. അവരെ അതില്‍ നിന്നും പിന്തിരിപ്പിച്ചു തൌഹീദിലേക്ക് കൊണ്ട്വരാന്‍ നമുക്ക് ബാധ്യതയുണ്ട്. അതിനു നാം തൌഹീദ് ഉള്‍ക്കൊള്ളുകയാണ് ആദ്യം വേണ്ടത്. മറ്റു കാര്യങ്ങളെല്ലാം അതിനു ശേഷം. അമ്പിയാക്കന്‍മാരുടെ പ്രബോധനം അങ്ങനെയായിരുന്നു. നബി തിരുമേനി (സ) പ്രബോധകന്മാരെ നിയോഗിക്കുമ്പോള്‍ ആദ്യം പഠിപ്പിക്കേണ്ട കാര്യം 'ലാ ഇലാഹ ഇല്ലല്ലാഹ്' എന്നാണെന്ന് അവരോടു വ്യക്തമായി പറഞ്ഞിട്ടുണ്ട്.

ഇക്കാരണങ്ങളാല്‍ നാം അമ്പിയാക്കന്മാരുടെ പ്രബോധനക്രമം സ്വീകരിച്ചു ലക്ഷക്കണക്കിന് ആളുകളെ ശിര്‍ക്കില്‍ നിന്നും മോചിപ്പിച്ചു. ആ പ്രവര്‍ത്തനം വിജയകരമായി നടക്കുന്നു. പക്ഷെ, ഈ തര്‍തീബ് ഇഷ്ടപ്പെടാത്ത ചിലര്‍ നമ്മെ കലഹപ്രിയരായി ചിത്രീകരിക്കുന്നു. നമ്മുടെ പ്രവര്‍ത്തനങ്ങള്‍ ശാഖാപരവും നിസ്സാരവുമായ പ്രശ്നങ്ങളില്‍ കുടുങ്ങിക്കിടക്കുന്നുവെന്നു വിലപിക്കുന്നു. ഫലമോ, യഥാര്‍ത്ഥ ദീനി പ്രവര്‍ത്തകര്‍ സമുദായ ദ്രോഹികളായി ചിത്രീകരിക്ക പ്പെടുന്നു.

ലോകമെമ്പാടും മുസ്ലിം നവോഥാനപ്രസ്ഥാനങ്ങള്‍ക്ക്‌ ശക്തിപകരുന്നത് യുവാക്കളാണ്. നമ്മുടെ ലൈനാണ് ശരിയെന്നു ഇന്ന് സര്‍വരും അംഗീകരിച്ചിരിക്കുന്നു. അതിനാല്‍ കേരള നദ്'വത്തുല്‍ മുജാഹിദീന്‍ പ്രവര്‍ത്തകര്‍ക്കും ജംഇയ്യത്തുല്‍ ഉലമയുടെ പണ്ഡിതന്‍മാര്‍ക്കും തൌഹീദിന്‍റെ സന്ദേശം പരത്തുവാന്‍ നാം ശക്തി പകരുക.

"നീ മൂലം ഒരാളെ അല്ലാഹു നേര്‍മാര്‍ഗത്തിലാക്കിയാല്‍ അതാണ്‌ ഈ ലോകത്തേക്കാളും അതിലുള്ള വസ്തുക്കളെക്കാളും ഉത്തമം" [ഹദീസ്]

അല്ലാഹു അനുഗ്രഹിക്കുമാറാവട്ടെ- ആമീൻ

ഹുസൈൻ മടവൂർ
പ്രസിഡന്റ്
ഐ എസ് എം കേരള



-- 

 
Design by Wordpress Theme | Bloggerized by Free Blogger Templates | coupon codes